-
وصلت لمرحلة لقيت ان المجتمع حولي أحسه ( فارغ ) بمعنى ان اللي حولي مجرد اجساد .. احس ارواحهم بمكان ثاني بس الاغلب اني مو قاعده احس بوجودهم
ما استلطف قعدتي معاهم او حتى كلامي معاهم .. ما لقيت اي توافق بيننا حتى الغرباء اقدر اقول اني ارتاح معهم اكثر من اللي اعرفهم ..
اللي لمن تقعد ( مجبر ) تبدا ترسم لهم شخصيات في راسك لمجرد انك تقدر ( تبلعهم ) او تدور لهم صفات ممكن تحسن من صورتهم بعينك ..
لدرجة اتساءل هل انا لهدرجه انطوائيه او فيني اكتئاب .. او صدق مع الوقت بانت معادنهم و اختلفت انا عنهم ؟!
هل تراكم الصدمات منهم يغير نظرتك للمجتمع او انت بكبرك تتغير .. مرور الوقت اكيد له دور .. بس صج انا طبيعيه او لا ؟!
احس اني هنا اطرح السلبيه اللي اعيش فيها او افكر فيها .. رغم تكاثر الافكار و التساؤلات .. احاول القى الايجابيه في كل وضع ..
كالعاده مجرد .. #فضفضه