"من لا يتقدم.. يتقادم"
صحيحة جدا، خصوصا في أمور التكنولوجيا، التطور فيها سريع جدا وما يمديك تلحق على شغلة إلا طلعت غيرها وصارت قديمة
مثلا اللابتوب، طلعت موضته في الألفية، خلال عشر سنوات صار شي قديم وصارت الموضة هي الجوالات، واللي يدور بلابتوبه يعتبر شيبة وقديم، الله يالدنيا
والسماعات السلكية كانت من أشكال الفخامة، ألحين طلعت سماعات البلوتوث اللي أسعارها بالمئات وفوق الألف، واللي يستخدم سماعة سلكية طفران وقديم
(على فكرة السماعات هذي سبب في تجمع الشمع في الأذن لأنها تدفعه للداخل، هذي المعلومة من أخصائية أنف وأذن وحنجرة بعد ما وديت لها بنتي كان عندها هذي المشكلة)
أيضا التقدم في لغات البرمجة سريع وما يمديك تلحق بسهولة، لازم تتفرغ تفرغ كامل لمتابعة كل جديد
أثناء تعلمي لتقنية جديدة - بشكل بطيء طبعا - تطلع تقنية ثانية متطورة وفعالة أكثر
أيام الحجر استغليتها في تعلم لغة برمجة (Python) وبعدين أخذت كورس عن تحليل البيانات بلغة بايثون، وكان يحتاج معرفة خفيفة بالبرمجة لأن فيه أكواد وشوية شغل، لكن نتايجه ممتازة، وصرت أستخدمه في تحليل إحصائيات الكورونا للتجربة والتطبيق.
بعد فترة ألاقي الشغل عندنا عاملين إعلان عن محاضرة مجانية عن برنامج جديد تبع الأوفيس اسمه Power BI، قلت خلني أحضر أشوف وش يطلع.
هذا البرنامج وظيفته هي تحليل البيانات، كل الأشياء تقريبا اللي تعلمتها بلغة البايثون بالأكواد هذا البرنامج يعملها بضغطة زر وبطريقة مرئية ما تحتاج أكواد ولا معرفة بالبرمجة
التلفزيون وقنوات الدش بعد ما كانت رمز للتقدم، وأيضا علامة فساد في أول الأيام، خصوصا لما تشوف الدش موجه في اتجاه القمر الأوروبي، صارت الآن شيء قديم ومن سوالف الطيبين، النت هو كل شيء، وسوالف القنوات الفضائية صرنا نعرفها عن طريق المقاطع المنتشرة في النت
وغيرها الكثير