|
رد: منّـي وإلـيّ والبعـض لكــم ~~~
قود مورنق افري بدي 
هاوريو 
بما اني ماجاني النوم وحيث اني في غثاء كل يوم
والسبة كله من النوم وهذا حالي دايم الدوم
^
^
سكنانا 
المهم
بذكر كم موقف حصلن لي مع الاستغفار والصلاة على النبي ﷺ
قبل تسع او عشر سنين وحنا راجعين من الحج تعجلنا وخلينا الحملة ورجعنا بالسيارة
قبلها فيه موضوع او مشكلة لها خمس سنين
ناشبة في حلقي ولا لقيت لها حل .. كنك غاص بقشرة طماطة من شينها
المهم يوم طلعنا من الطايف دعيت الله و قلت بجرب الاستغفار
وابدأ استغفر طول الطريق ساكت واستغفر والعيال يلتفتون علي عبدالعزيز وشفيك ساكت
اقول نايم او اتسمع لسوالفكم
بتلت استغفر من الطايف لين الرياض
رجعت للديرة ولاتغير شي استغفر يوم وانسى ايام بعد تقريبا شهرين او اقل سبحان الله انحلت المشكلة بأسهل الطرق وايسرها وانا في محلي ماتحركت ولاسويت شي .
حمدت الله وشكرته وجلست مدة مهيب قصيرة ادور وافتش كيف انحلت فجأة ، مالقيت الا انها من الله ثم الاستغفار
الموقف الثاني
قبل خمس شهور تقريبا كنت طالع من الرياض لحول الجوف ومعي اغراض واشغال يبيلهن مكان خاص
يعني ماينفع لهن فندق او شقة ، وكل ماكلمت بستأجر مكان قالوا مافيه او مأجرينها مشيت وقلت اذا وصلت دبرت نفسي
و فالطريق شيطاني مشغل اليوتيوب اويسمع الرادو
يوم انتصفت في الطريق قلت وراء ماتصير رجال وتسكر جوالك والرادو وتستغفر الله وتحمده ازين لك ، وفعلا بديت اردد الحمد لله واستغفر الله ، بتلت اردد اكثر من ثلاث او اربع ساعات وقبل اوصل الجوف بعشرين او ثلاثين كيلو ويجيني اتصال من صديق لاخوي من الرياض واخوي ماعلمه اني رايح للجوف ، هلا عبدالعزيز وينك فيه قلت فالديرة قال تكذب انت فالطريق جاي للجوف وحنا هناك مجتمعين وماخذين استراحة تعال عندنا ان كان مارتبطت مع احد ونزل اغراضك و ترى نحتريك على العشاء لاتأخر علينا !
قلت لا ماارتبطت مع احد وان شاء الله اني جايكم
الصراحة اني انصدمت وشلون تسهلت بالسرعة ذي وانا لي اكثر من اسبوع ادور مكان مالقيت .
حمدت الله وشكرته ، وعزالله ان الاستغفار يفتح لك ابوابك كلها.
باقي الموقف الثالث بس تعبت انا والشيخ اللي فيني اليوم من الكتابة
بكتبه بعدين ان شاء الله
قود نايت برضو افري بدي
هاللحين ليه قسم المدونات اغلبه زوار 
ترى عادي تدخلون بعضوياتكم
|