المواقف أعطتني لحظات عرفت نفسيّ فيها
من خلال ردة الفعل والسيطرة على المشاعر
مو سهل إنك تكبح شعور سواء حزن أو فرح أو غضب أو حتى إنزعاجك
وخاصة لو في عينك دمعه وبصوتك غصه هنا تدخل في حرب مع نفسك
انك تتمالكها لا يغلبك الوجع حرب إنك تكمل كلامك عادي
أصعب لحظة انك تهرب من شعور ماودك تواجهه
بينك وبين نفسك لما تعتريك لحظة ضعف مليانه شوق وفقدْ ووحده
ودك لو مامرتك حتى هذه اللحظة والناس حولك ودك تبعد
حتى لو جسمك في مكان وروحك في مكان بعيد ذهنيًا
كبح كل المشاعر سهل عليّ إلا اللي كانت بعد كلمة " وخاصة لو ...."
مشاعري كلها في يدي مافي شيء يقدر يغيرني لشيء
مافي مخلوق يقدر يبكيني او يخليني اعيش شعور ماودي فيه
مهما واجهت من مخلوقات عجيبه غريبه أنا التي لا تُبالي
تعلمت مااناقش انسان حتى لو كان نقاشه عن شيء يخصني
اسمع كلامه بدون مااسعى لتغيير وجهة نظره تعلمت بأن نظرته هذه تمثله
ماتمثلني تعلمت " احافظ على نفسي من الأخذ والعطى "
لكن أنا اللي هد حيلها فراق أبوها ، اللحظة اللي أذكر فيها أبوي
هنا ضعفي وشوقي مليان في عيوني
وآه من تنهيدة تعبر عن ألف شعور
وآخ من وجع صعب ينوصف
لما يذكرونه في مجلس مليان الوجع اللي في قلبي يطغى جدًا على ملامحي
وقتها انازع الدمعه لا تنزل وأبعد عيوني عن اللي حولي
طول عمري اعرف اني عندي قدرة عجيبه على التعبير بعيوني
ولكن من فقدي لأبوي دخلت في مرحلة عدم السيطرة
وتخوني النظرة والدمعه حتى النبرة
الله يرحمك ياحبيبي ويغفر لك ويسكنك فسيح جناته
آسفه على اللحظات اللي لهيت في الدنيا عن ذكرك
وببقى لك طول العمر ..
تعلمتْ :
بأن الفقدْ شعور مشترك بينك وبين أي مخلوق
لما تقرأ شوقه يغلبك لحظتها نفس الشوق .