|
رد: رسمتَك خيال ان جاز لي التعبيَر ( الصورَه الثالثَه )
بيوت الطين لا شفتـه تذكرنـي زمـانٍ دار
زمانٍ رغم ما به مـن قسـاوة ماحـدٍ سبـه
وهذا بيتنا واطلالـه اللـي عـودت تذكـار
وذاك الروشن وهـذا مكـان الزيـر والقبـه
وصفة جدتي مـا باقـي الا بابهـا واجـدار
وصوت الباب يصفر كلما هب الهـوى هبّـه
وهذا ما بقى من صفة امي والغمـى منهـار
غماها من جذوع الاثل واحلى من غمى الصبّه
وهذا كان مطبخنا وهـذا هـو مشـب النـار
قبل لا نعرف الغـاز وقبـل لا تطلـع الدبّـه
وهذا هو مجبّبنـا وهـذاك الكمـر ووجـار
وذيك الدكه القصيا وهذا الحوش نلعـب بّـه
سقى الله ذيك الايام الخوالـي ليتهـا تنـدار
سقى الله لا تجمعنا وصـارت عندنـا الشبّـه
سقى الله يوم تبرق ثم ترعد والسمـا مطـار
وصوت المثعب يسورب وكنك جالس بجنبّـه
وجتنا الجدة تسبحن علينا يوم هنـا اصغـار
على شمعة سراج القاز قبل لا نعرف اللمبّـة
زمن به للطفولة في خيالـي ذكريـات اكثـار
يا ليته ترجـع الايـام لوقـتٍ راح واحبّـه
ولكن ما مضى هيهات يرجـع والزمـن داور
يروح الوقت مع ناسه ويبقـى ربـي وربّـه
|