سقى الله زمان زال وبالذاكره مازال
فداه العمر لو راح الأول على التالي
.......
قبل من عوايدنا نعشق السهر لا طال
معي بكل يوم وليله اقرب من اظلالي
............
تنام بعيوني فارعه ماعليها شال
سترها الغلا والخوف من عين عذالي
............
وفجأه بلا موعد صحينا على زلزال
اخذ كل شيء ولا ترك غير غربالي
.................
بقى بيننا يمكن تواصل بقايا وصال
تجينى بعد مده تدور عن اوصالي
.................
مجرد سلام ومانسيتك وكيف الحال؟؟
هذا آخر الغالي وحقه هو غالي
................
وإذا مر وقت ولا لفى منها مرسال
بديت التفت عن حالها شوي في حالي
.................
عن اللوم والشرهه رسايل على تنهال
من يدينها واحسها تسؤلف قبالي
.............
يقولون :: مايبكي على المقفيه رجال
وانا اقول :: جعل قلوبهم مالها والي
.....................
على وين ماراحت اسوق القدم رحال
اخيل المدى والدرب موحش وبلحالي
..................
ادور تحت غيمة مواعيدها همال
ولا شفت منها غير موعد مع اهمالي
...................
خلاص انتهينا مابقى للسنين آمال
بعد ماقصر مرسالها مات مرسالي
.................
هي الحين صارت راعية بيت وام عيال
وانا الحين مثل اول على خبرها حالي