أهلا وسهلا بالجميع
في البداية حاب أشكر جميع من شارك وساهم في الأيام الماضية
يمكن من المفروض إني أذكر أسماء البعض وأخصهم بالشكر
بس علشان لا أنسى إسم و أحد ياخذ بخاطره فيكفي إني أقول إن في مجموعة
ماشاء الله عليهم كان لهم إنتاج وبروز في أيام الإمتحانات الفائتة
وطبعا الكل لاحظ هالشي
وأنا أتوجه لهم بالشكر الجزيل وأرجو لهم التوفيق الدائم وتحقيق الأمنيات
أما عن رأيي
بشكل عام كانت أسئلة الإمتحانات سهلة ومقبولة جدا ومباشرة
يمكن لأني كنت مهتم هالمرة أكثر من كل مرة قبل إني أقرأ الدروس وأستمع لجميع المحاضرات أول بأول بدون ما أخليهم يتراكمون علي.
بالنسبة للمشاركة والتعاون في الحل خلال فترة الإمتحانات الفصلية لي ملاحظات وأرجو ان تتسع صدور الجميع للي بقوله ولاحد ياخذ كلامي بشكل شخصي لأنه رأي ورؤية وإن شاء الله نستفيد من هالتجربة للإمتحانات الجاية.
أولا : عدد الحضور كان كبير وكافي علشان تجري الأمور بسهولة بينما لاحظنا إن المشاركة محصورة في أسماء معينة، وهذا يعتبر من باب خذ اللي تبيه وماعليك من أحد خلهم يولون وهالشي إنتوا تفهمون وش معناه.
ثانيا : البعض كان ما يدخل من بداية الإمتحان ويجي في آخر الوقت على الجاهز ويبي الحل كامل ويلوم لو طلع فيه خطأ. وطبعا هنا ما نعني اللي كان عندهم ظروف دوام أو إلتزامات تمنعهم من الدخول بدري.
ثالثا : البعض كان يدخل يحل من كيفه وإذا توهق نط وحط السؤال اللي متوهق فيه وياخذ الحل ويختفي وحتى بعض الحلول كانت موجودة في تجمع الأسئلة لكن الأخ أو الأخت مو حابين يتعبون حالهم يدورون شي يبون كل شي جاهز.
رابعا : كان واضح جدا إن مجموعة مايدرون عن الصفحات الأولى في النقاش ومدرعمين على طول على آخر صفحة يدورون الحلول والمساعدة من غير ما يدرون وين التجمع وش الأسئلة اللي تمت الإجابة عليها ولا شي. كل شوي وناطين وين التجمع ووش حل السؤال الفلاني ومن هالكلام. بصراحة مالهم حق.
على الأقل يتعبون شوي في البحث في التجمع وش ذنب مدير التجمع إنه يلحق على كل هالبوستات.
خامسا : الحمل كان متعب على مدير التجمع بسبب كثرة البوستات والصفحات. كان الكل ينط وحط كل سؤال في بوست لحاله ولو إن الكل التزم بالنظام الموضوع في بداية كل تجمع كان الموضوع صار أسهل على الكل.
يعني لو بس خمس أشخاص جابوا الأسئلة وعطوا فرصة لمدير التجميع يرتبهم وبعدها كل شخص يدخل وتطلع له أسئلة جديدة يحط الجديد فقط كان أسهل أو اللي حلوا كامل وجابوا 10/10 يحطون أسئلتهم كاملة لتأكيد الحل كان الموضوع بيصير أكثر ترتيب.
سادسا : أتمنى في المرات القادمة إن يكون في مجموعة تكون هي الفدائية للدخول أول ناس وتجيب الأسئلة بحيث ما يصير لخبطة والكل يجي ويحط له بوست طويل فيه الأسئلة كاملة بدون حلول كاملة.
سابعا : عند حل أي سؤال ما ينفع كلمة أعتقد وأظن ويمكن لأن بيصير فيها تشتيت أكثر وزيادة في البوستات بدون داعي. وبدل عن هذا لو كل شخص مسك سؤال أو سؤالين وبحث عنهم في المذكرات وجاب الإجابة الصحيحة كان الأمور صارت أسهل بكثير.
ثامنا : نتمنى من مشرفي المنتدى إعطاء صلاحيات لمدير التجمع ولو مؤقته وقت الإمتحانات علشان يقدر يحذف الأشياء الغير صحيحة أو غير مرغوبة أو يعيد ترتيب الوضع.
تاسعا : أكرر شكري الكبير لكل المشاركين وكل من حاول أن يساعد وطبعا مدير كل التجمعات الفائتة ونتمنى للمدراء السابقين إن الله يسهل أمورهم ويخفف أعبائهم علشان يرجعون للملتقى مثل ما كانوا نافعين الكل.
عاشرا : وهذا اعتبروه نوع من التحيز "للمزاح فقط" : لاحظت إن مشاركة البنات كانت أكثر من الشباب. وينكم يابني جنسنا أين أنتم من أنتم ماذا تريدون.
تحياتي للجميع ورجائي لكم بالتوفيق.