|
الساكت عن الحق ( شيطان اخرس ) .
حسبي الله و نعم الوكيل
ألف مره ..
أمس لما دخلت الإمتحان كنت متفآئله خير ع كلام الدكتور ف المباشرة الثالثة + أني ذاكرت ب ذمه و ضمير من المصادر التي أشار اليها + المحتوى
اقسم بالله من صدمتي بالأسئلة تركت الورقة صرت اتلفت يمين و شمال ، صدق ذا نموذجي وإلا فيه غلط ؟
شفت الوجيه المكشره و علامات الإحباااط ب وجيه زميلاتي ..
ذكرت الله و حاولت احل لكن للأسف صار عندي ارتباك و توتر بشكل مو طبيعي ،
خلاني أنسى اللي ما ينسي ، صرت ما اذكر الا 4 قوانين 1 منها جا
الباقي كلها تخربطت فوق بعضها ، لأن صرت أشوف مطلوب مني أشياء ما مرت علي !
بديت أشك فمذاكرتي و معلوماتي هل هي صح او صار عندي التباس ف المذاكرة و فهمت غلط
و في وسط هالحيره اسمع مراقبتنا المزعجة اللي ما تسكت من تحذيرات و أوامر
( اللي حابه تطلع تتفضل خلص نص الوقت )
نص الوقت راح !!! و تونا قلنا بسم الله
قامت بنت و سلمت لها الورقة مع كامل الإحباط و الألم ف تعابير وجهها
و باقي الفصل ! هدوووء ما تسمع الا صوت المكيف ، يا بنات أكرر خلص نص الوقت
يا الله .. يارب ساعدني
يارب نوّر علي ، مو معقول اللي جالس يصير ،
و انتهى النصف الآخر من الوقت بين عمليات حسابية فاشله تتضمنها جملة ( ليس مما ذكر )
و بين حيرة في تشابهه الخيارات النظرية
اللي ما قد شفناها لا في محتوى ولا اختبر نفسك ولا واجبات و لا اختبارات سابقه !
طلعت من الاختبار مجبورة و لوّنت الخانات ب شكل عشوائي لأني مهدده ب سحب الورقة مني ،
و ربما غيري سُحبت منه و هو ما لوّن
انا بنت في خانة العشرين ، باستطاعتي الفهم و الحفظ بسرعه و مع ذلك ضامنه الرسوب في الماده
أمهاتنا اللي يجون يختبرون وش سووا اجل ؟
حرام هذا ظلم ..
الدكتور ما التزم ب الكلام اللي قاله ، ولا كانت الأسئلة مصاغه على أسلوب شرحه !
اخواني أخواتي ..
حنا على مشارف التخرج انا ما يهمني النجاح قد ما يهمني ( المعدل ) تعبنا و حنا نحافظ عليه في مستوى معين .. على اخر المطاف ينزل المعدل على غير حق ، ليه التعجيز هذا ؟؟
ارجوكـم خلونا نتكاتف يد بيد لين نوصل لحل يقضي على هذا القلق و الإحباط اللي مو مخلينا نبدأ نذاكر ماده ثانيه
1/ اطلب من اخواني الطلبه في منطقة الأحساء زيارة جامعة الملك فيصل و التحدث شخصياً مع العميد او الإداره
2/ حنا الطلاب و الطالبات جميعاً لا نتوقف من إرسال الشكاوى الى العميد و أستاذ احمد الشعيبي و أيضاً لمقدم برنامج انتساب نت أ. محمد
3/ نوحد المطلب / أسبابنا كثيره و لكن هدفنا واحد لحد يقول يضيفون لنا 5 درجات ولا 10 ولا 20 !!!
اذا في فئه منكم أعزائي بس تبي تنجح اللي هم الموظفين ، فيه فئه اخرى يهمها المعدل حنا اللي جالسين ف بيوتنا
و على ذلك ف المطالبة بإعادة الاختبار او تعويضنا ب مقدار لا يؤثر على معدلاتنا بشكل سلبي
اتمنـى يكون فيه تفاعل و لحد فيكم يصير أناني ، يبي ينجح و يبي يعوض و يبي يتخرج و يبي و يبي
و هو جالس ما يسوي شي .. ينتظر ثمار جهود الطلبه تنزل عليه !
من اول ما بدينا و حنا نواجهه صعوبات مع الدكاترة ( دفعة المغضوب عليهم )
و لله الحمد بنتخرج و حنا فخورين ان تكاتفنا و جهودنا و ترابطنا ف بعض يتكلمون عنه كل المستويات
حتى الانتظام مافيه تعاون بينهم مثلنا .. استمروا الله يقويكم و يعطيكم كامل العافيه
عذراً عالإطاله .. و لكم جزيل الشكر 
|