ملتقى طلاب وطالبات جامعة الملك فيصل,جامعة الدمام - عرض مشاركة واحدة - اكاديمي عام نصائح خريجة من جامعة الملك فيصل إلى جميع خريجين و خريجات الثانويه

راعية الكيف · #1 2014- 5- 21

السلام عليكم ورحمة الله وبركاته

اسعد الله صباحكم / مساءكم

قبل كذا احب اعرفكم على نفسي << بدينا

لكن انصحكم تقرأون موضوعي مع كوب قهوه وعلى هدوء و روقان << ناوية تهرج هرجة تصدع الراس

أنا خرجية دفعة 2014 من جامعة الملك فيصل / كلية التربيه - تربية خاصه مسار الإعاقه العقليه بتقدير ممتاز ولله الحمد << اللي ناويه تدخل هالقسم تدرعم لي على الخاص وافيدها باللي تبيه

بما اني خريجة بقراطيسي بعلمكم كل حاجه ممكن تفيدكم من طقطق للسلام عليكم

وبعلمكم ايش هي الاخطاء اللي ممكن تقعون فيها اثناء التسجيل في الجامعه و ترتيب الرغبات

طبعا من اصعب القرارات اللي مرت علي في حياتي وقتها كان هو :
التسجيل في الجامعات واختيار الرغبات وترتيبها

كان جدا جدا صعب بحكم ان مافي احد يفيديني وينصحني وقتها وكنت اكبر اخواني

وكل ما سألت احد ما فادني كثير

بس كنت اعرف اصرف نفسي واحل الامور المعقده

<< وخروا عنها بس

ندخل في زبدة حكينا

بعد ما تخلص اختبارات , ريح بالك أسبوع بس ما تزيد ولا تنقص

وبعد ما تطلع نتيجة الثانوية العامه ونتائج قياس هِنا وقت الجد والعمل

كل ما عليك طال عمرك تجيب دفتر ابو اربعين ورقه + قلم << ركزوا على دفتر مو ورقة

طبعا انا قلت دفتر مو مذكرات الجوال

<< على كيفك هو

بس حقيقةً وعن تجربة شخصيه الافضل لك نفسيا الدفتر
لانه يخليك تعبر عن مشاعرك مع قليلا من الرسوم العاطفيه الهامشيه

<< اخلصي بس

نجي للمهم

اكتب في الصفحه الاولى من الدفتر
عن طموحك

ايش تبي تصير في المستقبل ؟

ايش هدفك من الحياه ؟

بعدها لو ما تحقق هدفك اللي كتبته

ايش ممكن تسوي
خلكم مرنينين في هذي النقطه

وابدا ابدا لاتتعصبون على هدف وحلم واحد

عشان لو ما تحقق ما تتاثر نفسيتك كثير

اكتبوا
ايش مخططاتك مشاريعك كل اللي تبي تسويه بعد الثانويه العامه
لانكم لو كتبوا كل هذا , بتزيد ثقتكم في نفسكم
وعشان تعرفون انتوا يش

لان اختيارك لحلمك وهدفك هو اللي بتبني عليه
لان هذي هي النقطه الحقيقيه لدخولك في الحياه العمليه

بعد ما كتبتوا كل شيء

افتحوا على الصفحه اللي بعدها واكتبوا المعلومات هذي وحطوها في بالكم

وبيصير الاعتماد واختيار وترتيب الرغبات عليها
المعدل التراكمي :
درجة التحصيلي :
درجة القدرات :
وبعدها احسب درجتك الموزونه وفي الغالب تكون 30%تراكمي + 30%تحصيلي + 40%قدرات = الدرجة الموزونه

ليه اكتب كل هذي المعلومات !!

انا اقولكم ليه

لان ترتيب رغباتكم بيعتمد عليها

لنفرض مثال ان طلعت درجتك الموزونه 80% وانت تبغي طب
طبعا بالحاله هذي تنسى انك تحط طب من ضمن الرغبات , < ليه !!
لان 1- نسب الطب والكليات الصحيه غالبا ماتكون عاليه جدا جدا
2- بتقلل فرصك في القبول لان عدد الرغبات بتكون محدوده غالبا بتختار 7 رغبات بس

انا بقولكم كيف تعرف وتخمن حظك في ترتيب الرغبات ؟؟

كل اللي عليكم انكم تشوفون اخر نسبة موزونه وقفت عليها الكليه في العام السابق
طبعا ماراح تكون نفس النسبه وهذا يعتمد على شطارة الدفعه اللي انت متخرج معها
عشآن يكون عندك فكره وما تحبط وتتحطم كثير وتضيع عليك فرص
^بس غالبا تكون في حدود هالنسبة مثل ما قلت في المثال السابق عن الطب^
<< حوسة بس افهموها غصب

بعد كذا اكتبوا الجامعات اللي انتوا ممكن تقدمون عليها << لا تنسون في الدفتر

ويفضل تسجلون في اكثر من جامعه
مثل : جامعة الدمام - جامعة الملك فيصل - جامعة الملك سعود ......إلخ
حطوا كل جامعه في صفحه << ابثرتنا مع الدفتر

وافتحوا على موقع كل جامعه وشوفوا ايش هي الكليات الموجوده والتخصصات
واختاروا اللي تفضلونها وترغبون لها ورتبوها ترتيب حسب الافضل

وانتبهوا لهذي النقطه ( حسب الافضل والرغبه ) لان بعد كذا بتكون فيه ترقيات

مثال :
لو انا رتبت رغباتي
1- كلية الطب
2- كلية الصيدله
3- كلية الهندسه
4- كلية الاداب
5- كلية التربيه
6- كلية العلوم
7- كلية المجتمع

في الدفعه الاولى : نسبتي صارت عند العلوم
في الدفعه الثانية تلقائيا صارت التربيه
ممكن في الدفعه اللي بعدها توقف عن الاداب وماتوصل نسبتي عند الهندسه ولا الصيدله ولا الطب وانقبل في الاداب
طبعا هِنا يصير اجباري اني ادرس في الاداب ومافيه اي مجال اني اغير رايي واقولهم خلاص ابي تربيه , ومن هالكلام

فعشان كذا انتبهوا