يا هاجس عنا علي طالبك مج
و الا تعال و راقي الذوق ناجه
الخيل للمغزى اذا مست السرج
والحيل بالله يا منوي هجاجه
وشرب الفتى من غير مشرب يده همج
قاله مجرب فج صدره خلاجه
دهام وايام الزمن بعضها عج
والضيق ضيق مفوهات الزجاجه
تكفى يابن عمي ترى خاطري غلج
حرف جبرني مالنا فيه حاجه
لا شك قافي له مدخل ومخرج
سوقت سوق مالقينا خراجه
انا صريح و غيري ابرد من الثلج
وعوين من له مع الناس حاجه
اما سفهك وحط موضوعك بدرج
والا تغلى جعل يفقد علاجه
يارب لا تجعل لنا موقف حرج
عند الخسيس اللي براسه نعاجه
ويارب لا تخلي من اللي لهم عج
الطيب و وجيه غشاها ابتهاجه
الوجه يضحك والقفى ما بهم هرج
طيب على ساس ولا به عواجه
مثل النجوم وخل مامال من بالهرج
كلنا يوضح لنشاما سراجه
وانا بخير وبراس قوم لهم برج
يوم البشر والشر كوش عجاجه
الطيب ورثي لي عشاقه ومنهج
والله يجنبنا الرخم والحلاجه
والله و لاغيره له الصوم والحج
عليه شكوى همنا وانفراجه
سبحت بسم اللي بروقه تلاعج
من معصراته سج ماها وهاجه
بسيل (ن) يهول العقل لامن تدرج
اني لها والصبح فلل حجاجه
في خايع لامن ربيعه تبرهج
وعذب النسايم روقت لك مزاجه
غرام غمر عن اصحاب البلد هج
قطع الخرايم يا ابن عمي علاجه