المشاركة الأصلية كتبت بواسطة eimi

وعليكم السلام ورحمة الله وبركاته

اول شي نظرا لانه اطباءالتوحد شبه معدومين عندنا فخليه يعرضه ع طبيب مخ واعصاب واول خطوة بيطلبها الطبيب لو فاهم
تخطيط للسمع
تحليل للغده الدرقيه
رنين للراس

لانه ساعات ضعف السمع يسبب اعراض مشابهه للتوحد لانه الطفل مايسمع بوضوع فينعزل ع الناس
والغده لانه خمولها يسبب تاخر احيانا للكلام
والرنين طبعا لو فيه ضمور شي لاسمح الله

اذا كل شي سليم يروح بعدها لطبيب اطفال نفسيوالافضل طبيبه عشان الام تقدر تتعامل معاها باريحيه وتشرح لها حالته من الولاده
وراح توجهكم لمدارس تفيده

اهم شي اذا الطفل نومه طبيعي وماعنده فرط حركة شديد نصيحة اخت محبه لايستخدموا له اي ادوية غير الهايبول والمكملات الغذائيه كفيتامين دال او غيره فقققط
لانه الادويه الي بيعطوها بعض الاطباء لاطفال التوحد قويه وتسبب ادمان او اعراض سيئه مستقبلا فلايستخدمله شي دام ماعنده فرط شديييد مايقدروا يسيطروا عليه

والان عبال مايعرضه لدكتتور وكذا يحذف جميع قنوات الاناشيد
اذا عنده اي جهاز ايباد ايبود غيره يمنعوه عنه
لانه للاسف اغلب حالة اطفالنا الي سببها قنوات الاناشيد + الاجهزه لانها تسبب لهم عزلة وعدم تواصل اجتماعي

انا بنتي الان 4 و6 اشهر والحمدلله طبيعيه الى حدٍ ما مو ناقصها الا تزيد محصلتها اللغوية لانها اقل من الي بسنها
وتعتمد ع نفسها بالاكل والشرب والحمام وتتكلم وتعرف الحروف والارقام عربي وانجليزي
مع انه وصلت سنتين وعشره اشهر وهيه لاتعرف اسمها ولاترد لما نناديها وكانها عايشة بفقاعة صابون ولاتحس فينا من حولها

الدكاترة الي رحتلهم
محمد جان مخ واعصاب الافضل ع مستوى جده
نفسيه اميره بطراوي بالسعودي الالماني
المدرسه افكار الصغار كمان افضل مدرسه بجده لهذي الحالات ومخلصين لو شافوا الطفل وحسوا انهم مابيقدروا يفيدوه مايستقبلوه

بنتي اخذت عندهم ترم تهيئه ودمج
وسنه روضه اول
والسنه الجايه روضه 2
والي بعدها تمهيدي
وع صف اول بإذن الله حتدخل مدرسه مع الاطفال الطبيعيين

واخر شي اعذرني لو كلامي ملخبط لانه كل شي افتكره اكتبه
واذا احتجت اي اسئله ثانيه انا موجوده
والله يشفيه ويشوفوه متفوق ع الطبيعيين بإذن الله