معقول باقي من الشهر 4 أيام
معقول راحت منه 26 ليلة ؟؟
شفتوا أجل مرت بنا مثل الأحلام
ما من جديد وكلّـن يعيش جيله !!
اللي معانا العام هالعام ما صام
منهو ضمن مستقبله وش يجيله ؟؟
في جيلنا مادامت لـ جيش صدّام
وفي جيلهم وين أبرهة وين فيله ؟؟
كذا الحياة تمرّ عام ٍ ورى عام !
كم فرّقت بين الخليل وخليله !!
شف الليالي كم تقضّت بالأعوام
وحنّا نقول أن الليالي .. طويله !!
ياهيه صحصح عندنا لك خبر هام
نصّ الأماني في الحقيقة قتيـله !!
دنياك هذي حزن وجروح .. وأوهام
ومالك على دنياك .. مكر وحيــله !!
كم واحد ٍ ودّع حبيبه وسط خام ..
وعلى حبيبه حدّر الدمع سيـــله !!
بكى فراقه .. مرّت أيام ما نام !!
بكى .. وروحه من فراقه عليـــله .!!
لكن نسى إنه كذا .. بعد أيام ...
نفس الأيادي .. يمّ قبره تشيـله !!
يارب عفوك .. قبل تلتف الأقــــدام
يوم الخليل يخون عشرة .. خليله !!
ويا رب ثبـّتنا على دين الإســـلام ..
واللي خذاه الطيش تهدي سبيـله !!
أقولها .. والعمر .. لو طال ما دام
وإعرف سنين العمر ياخي قليله !!
والحين باقي من الشهر .. 4 أيام
طالبك .. عوّض فيه 26 ... ليــله