وعليكم السلام

الله يوفقكم ياارب ويسهل عليكم ويجعل هالترم بركة وخير عليكم ..
ما أبي أخوفكم بس ترى مستوى خامس من اثقل واصعب المستويات .. يبي له شدة حيل ومذاكرة أول بأول لانه بيفتح لكم مواد كثيره .

فنون المحادثة ماده سهلللة وممتعه فكرتها تعتمد على البرزنتيشن والمحادثة داخل الكلاس ، طبعاً المحاضرة تكون كله سوالف بالانجليزي عشان تتطور عندك مهارة التحدث ، وراح يكون عندك 3 برزنتيشن تسوينهم طول الترم بأي موضوع انتي حابه وتقيمك عليه الدكتورة وراح يكون فيه اختبار شفوي تقعدين مع الدكتوره وتقعد تسألك كم سؤال . أنا أخذتها مع ازدهار طبعاً ماعليهاا كلاااام عسل هالدكتوره . ويمدحون لبنى باهمام لهالماده بعد .

مقال : نفس الرايتنق 2 بس بشكل أوسع ، راح تتعلمين انواع للمقالات وكيف تكتبينها وكيف تحطين رأيين متناقضين بالمقال وتفندينهم ، طبعاً الماده تعتمد على مهارتك بالكتابة وكمية الفوكاب اللي عندك . تدرس هالمادة فوزية زكي ونداء عزام وآمنه صالح وفيه كثيير بعد وتقريباً كللهم كويسيين .

فكر وثقافه : مادة فلسفية بححححته تتكلم عن الفلاسفه في القرن ال 17 وراح تدرسين اكثر من 20 فيلسوف وأفكارهم وايش العلاقه بين فلسفاتهم . الزبده المادة تحوووس . كل اللي عليك انك تذاكرينها اول بأول ، نصيحه أول بأول ! وان شاء الله تعدينها . اللي يدرس المادة هذي عادة لمياء المبارك واكييد الكل يعرفها. بس يقولون هالترم ماراح تكون موجوده فما أدري مين بيمسك هالمادة .

نظريه الترجمة : مادة حلوة وسهله ، راح تتعلمين مبادئ الترجمه وبعض النظريات اللي فيها وكيف تترجمين نصوص وعبارات من عربي لانجليزي ومن انجليزي لعربي بعيد عن الترجمه الحرفية ، المادة سهله جداً اذا انتي عندك محصول كلمات زين . درستني سلوى الوفائي متمكنه من الماده جداً وماتظلمم بالدرجاات ابدد ، بس انا ابداً ماحبيتها ما أدري ليش كذا من الله . وفيه عندك ليلى الحسن روووعه من جميع النواحي اذا لقيتي اسمها لا تفوتينها .

صوتيات : ماده دسسمه شوي بس ممتعه ، هي تتكلم عن الاصوات ومخارجها وكيفية نطقها . مواضيعها كثيييرة بس ممتعه بدون استهانه فيها . هالماده هذي ما أتخييل أحد يدرسها اروع من أميمه مغربي .

أدب القرن 17 : تنقسم هالماده قسمين شعر ودراما . الشعر راح تاخذين قصايد وتحللينها وتشرحينها ومن هالكلام نفس اللي أخذتوه بعصر النهضة والدراما بعد نفس الشي راح تدرسون مسرحية the way of the world . درستني حصه الكهلان شرحها بسيط ومختصر واسألتها كويسه مع انها بعض الاحيان تحوسك بالمحاضرة وتخربط افكارك ، يعني باختصار مو مرتبه بالشرح . تدرس هالمادة معها علياء بدر ماعمري جربتها ناس يمدحونها وناس العكس . بس اذا اضطريتي خذي عند حصه .

نشأة الرواية : مادة حلوووه مرره ، تدرسون روايتين مختلفات ، تدرسين فيها القصه والثيم والشخصيات وكل شي . وراح يجيك بالفاينل مقال تكتبين عن وحده من الروايات . المادة ماسكتها ليلى العقيلي لحالها ، رووعه هالدكتوره شرحها يجنن يعيشك جو واسألتها سهلله بس بالدرجات لك عليها شوي ماتاخذين الا حقك فقققط . وشديده شوي بالبرزنتيشن مو اي شي يعجبها .
بس بشكل عام مره كويسه .

نجي للمواد العامه :
النظام الاقتصادي : تتكلم عن الاموال والبنوك والمصارف في الاسلام ماكانت صعبه قد ما كانت
كثيرة ، دكاترة الدراسات كللهم كويسين .

بالنسبه للماده الثانية لا تفكرين تاخذين الاسلام وقضايا التقنية لانه ماسكها دكتور واحد وجنن البنات على وقتي وندموا انهم اخذوها .

انا اخذت حضاره اسلاميه : سهللله الماااده وخفيييفه اتمنى ادرسها مرره ثانيه تتكلم عن عن العلماء المسلمين زي ابن سيناء والرازي وجهودهم في تطور العلوم وتتكلم عن بعض الحضارات بالدول الاسلاميه . انا اخذتها مع هدى الحسين رووووعه هالدكتوره شرح ، تعامل ، درجات ماتتفوت الصراحه .




وبالاخير حابه اقول كلمتين تقرقع بقلبي وما ودي البنات يمرون في اللي انا مريت فيه :

شوفوا المستوى هذا منعطف طريق يحدد بقائك في الجامعه من عدمها . لو تشيكون ع الخطه راح تلاحظون ان المستوى هذا الوحييد اللي فيه 9 مواد اغلبيتها دسمه وكل وحده فيها حقها ، اذا انتي مو مستعجله ع التخرج لا تاخذينهم كلههم مع بعض ! نصيييحه لا تاخذينهم كللهم .. اجلي المواد اللي مالها متطلب قدر الامكان . راح تنضغطون مع كل هالمواد و كل ماده ولها برزنتيشن لحال وكويزات وبحث وميد وفاينل ، راح تتشتتين وماراح تقدرين توفقين بين كل هالمواد ويمكن لاسمح الله ينزل معدلك بسببها او تحملين ماده .


وبس ياارب كلامي فادكم واذا تبون اي
شي اسألوا لا تتردون ، ومافيه مانع تنسخون كلآمي وترسلونه عشان يستفيدون اكبر عدد من البنات .

ولاتنسوني من دعائكم
وبالتوفييق للجميع ياارب