هلا اختي
اعتذر توني اشوف الرساله
شوفي حبيبتي انتي اول مستوى لج عشان جذي تابعي الملتقى وموقع الجامعة خلال هالاسبوع واسبوع الجاي
عشان تعرفين منو دكاترتكم
على فكرة بسال تعرفين تدخلين على النظام في موقع الجامعه؟
علشان من خلاله اول ماتبدا تنزل محاضرات تعرفين وفي نفس الوقت راح تعرفين اسماء الدكاترة
علشان لو في مادة مغيرين دكتورها
عموما انا الحين بفترض ان مراح يغيرون ولا دكتور زين
تبدا الدراسة اسبوع الجاي المفروض خلال الاسبوع الجاي والي بعده تشترين الملخصات والكتب(طبعا بعض المواد تحتاجين كتابها على حسب الدكتور بس غالبا مانحتاج نشتري كتب)
المهم اشتري الملازم او اطبعيها اكيد بتلاقينها بالملتقى عند مستوى اول
واشتري اله حاسبة واقلام مع اقلام التاشير الفسفورية ودفتر تخلينة دفتر اساسي تكتبين فيه خطتج وجدولج وجدول الاختبارات وجدول لكل مادة يحتوي على خانة بعنوان المحاضرات وخانة بعنوان المحاضرات المباشرة وخانة بعنوان الواجب وخانة بعنوان المناقشات
علشان كل ماحملتي محاضرة تاشرين في الجدول وكل ماحليتي واجب تاشرين وكل ماحليتي مناقشه تاشرين عشان تالي ماتحتاسين وماتعرفين اش حليتي واش حضرتي وشنو ناقصج ..اتمنى فهمتي علي
المهم حاولي كل امورج تكون جاهزة خلال هالاسبوعين عشان تبتدين
مثل ماقلت لج قبل لو فرضنا ان الدكاترة ماتغيروا(هاذا معناه ان كل المحاضرات موجودة على اليوتيوب فنقدر نمشي على خطتنا بدون اي مشاكل بس لاتنسين حتى لو شفتي المحاضرات على اليوتيوب لازم تحملينها من الموقع علشان ماتضيع عليج درجة المشاركة اي وقت تقدرين تحملين المحاضرات مو مشكلة المهم قبل الاختبارات تكونين محملة كل المحاضرات وحاله كل الواجبات)
ارجع للموضوع بحسب من يوم19 ذي القعده الى 23 صفر (يوم24 صفر اول ايام الاختبارات)تقريبا 13 اسبوع
عادة اخر 4اسابيع يعني تقريبا شهر قبل الاختبارات هاذي اشيلها على جنب اخليها للاتستعداد النهائي اخصص لكل مادة ثلاث او اربع ايام على حسب صعوبتها بالنسبه لي بحيث اذاكرها كاني بكرة بختبر ومهم الرياضيات والمحاسبة انج تحلين المسائل والامثلة بنفسج واكثر من مرة عشان تتمكنين منها عدل
وهم هالفترة اشيك كل الواجبات والمحاضرات اتاكد منها اني حليتها كلها وان كل المحاضرات حملتها وكل المناقشات حليتها ترى حرصي عليها لان المشاركة عليها 30 درجة حرام تضيع
بالنسبه لي مهم ام اخر اربع اسابيع اخليها للاستعداد عشان ادخل الاختبارات وانا واثقه ومرتاحه وفي نفس الوقت يكون عندي شوية وقت للطوارئ يعني لاسمح الله مرضت ولا اي ظرف حاشني خاصة ان الاختبارات بين كل مادة ومادة يوم او اثنين طبعا بالنسبه لمتوى اول اتوقع في وقت بين كل مادة وثانية بس هم استعدي من قبل احسن اي ومهم ان تاخذين لج اجازة يوم او يومين قبل تبدا الاختبارات تريحين فيهم عشان ماتبدا الاختبارات وانتي تعبانه
زين قلنا بيكون عندنا 13 اسبوع شلنا منها اربعه من الاخير يبقى 9 اسابيع نشيل منها اسبوع للعيد يبقى 8 ونشيل اسبوع للاحتياط عشان لو تاخرتي ولا طلعوا مغيرين دكتور ماتتوهقين
جذي يبقى 7 اسابيع تقسمين كل محاضراتج عليها االمفروض كل اسبوع تحظرين 10محاضرات خليها كل يوم محاضرتين اما الجمعة والسبت خذيه اجازة حالج حال المدارس
وخلي لج وقت ثابت كل يوم تجلسين تحظرين فيه النظام مهم لج
بالنسبه لي الصباح لي راحوا العيال المدارس طلعت اغراضي وفتحت الاب توب واكون محددة من بداية الاسبوع كل مادة شنو بحظر منها ساعات احظر اربع محاضرات من مادة وتلقين مادة مااحضر لها شي هالاسبوع على حسب لان ساعات انحكم بموقع الجامعه لما يكون الدكتور جديد افتح الملخص على المحاضرة واشغلها واركز معاها ولو المادة محاسبه رياضيات لازم قلم واله ودفتر للخرابيش خلال المحاضرة كل مااعطانا مثال اوقف المحاضرة واجرب احلها
وااشر على الملزمة على النقاط المهمه ولو قال الدكتور ملاحظة حسيتها مهمة اكتبها
في البداية بتتعبين لاكن اذا التزمتي بالنظام مع الوقت تتعودين
ودائما لو صادج ظرف وطوفتي يوم او حتى يومين حاولي تعوظين الي طافج خلال الاسبوع اللي بعدة فمثلا بدال ماتحظرين 10 محاضرات خليها 12 او 14
احس هذرت عليج ونفخت راسج بس مو مشكلة مستعدة امشي معاج خطوة خطوة راسليني على الخاص باستمرار عشان اسوي لج جدول واضح ومرتب
وعلشان اساعدج في اختيار الملخصات
عندج خمس مواد وكل مادة لها 14 محاضرة