|
لو الحكي ينفع نفع قبلي الشام ،*
السلام عليكم ورحمة الله وبركاته
قصيدة لـ عبد الكريم الجباري
ياكثر ماشالت ظلوعي من الالام
ولا درى فيها من الخلق مخلوق
واذا لزمت الصمت مانيب ملاّم
وش لي افك حلوق واصكر حلوق
امشي وافضفض ليه؟ والعالم تنام
وانا اسهر لحالي ولا غمّض الموق
لو الحكي ينفع نفع قبلي الشام
الي تجر الصوت والصوت مخنوق
خلوني اسكت دام الايام قدام
لان العرب تقضب على كل منطوق
يمكن اخط اقلام واوهام واحلام
لكني ابقا دايما نظرتي فوق
من لايسفّح في سما العز لاحام
تربط يدينه عن سما الحوم بسبوق
النفس مثل الحر والحر عزام
والي يشد العزم ما عاقه العوق
وانا اعترف صبري تردى من العام
لاني اخيط الجرح والقاه مفتوق
ماعاد باقي غير تنكيس الاعلام
من كثر صبري ملني كل معلوق
النفس لو تعرف تصاريف الايام
تطرق لها طرقٍ فلاهوب مطروق
وياكثر ماشلنا من ذنوب وآثام
والله يمهلنا ولاعندنا ذوق
 
|