2014- 9- 25
|
 |
مشرفة المستوى الثامن علم اجتماع سابقاً
|
|
|
|
|
أنا أخطر على نفسي من الناس !
" تحدث بإيجابية ، ولا تسمح لكلمة سلبية عن ذاتك أن تمر على لسانك
فأنت تسمعها ، وعقلك يحفظها ، واللاوعي يقوم بتخزينها " .
من كتاب سلمان العودة “ أنا وأخواتها “
من زمان احس ودي ابربر عن هالموضوع شوي والله يعينكم مسكت معي الحين .. 
فيه موضوع شفته هنا قريب من هذا بس مو كثير ..
يالله بسم الله توكلنا على الله ، اللهم انا نعوذ بك من شرور أنفسنا !
جد جد يعني ترا الشخص مافيه اشين منه على نفسه ، 
تقدر تفكر تفكير ايجابي ويصير كل شي تمام ونفسيتك زينه 
وبنفس الوقت اول ما تبدأ تتخيل شي شين على طول تتنكد وكأن التفكير صاير .
انا عن نفسي احياناً تجي على بالي افكار وتخيلات شينه مثل لو اتخيل
احد عزيز علي يموت الله لا يفجعنا ، توصل لدرجة اني اصيح وكأن الشي صار!! 
واصير متنكده لمده من الوقت لمجرد اني جبت تفكير مو زين على بالي .
قريت مره موضوع يقول انه من افضل طرق العلاج انك تكلم نفسك بصوت مسموع
او قدام المراية وتقول لها وش تبي منها وكل شي اهم شي الصوت ،
جد والله لا تستخفون بالسالفه ، يعني مهم مره انك تسمع اللي انت تقول . 
اقنعكم؟ لو كنت بمكان وفيه شخصين قريبين منك ومالك دخل فيهم
ويتكلمون مثلا عن عاده شينه بشخص ثالث مو موجود حتى ،
ويقولون والله كل شي فيه زين الا هالطبع ومن هالكلام ،
وأنت ( سمعت ) هالكلام اول شي يجي على بالك تسأل نفسك انا كذا ولا لا؟ 
واذا كان هالشي فيك بتتضايق حتى لو كان كلامهم مو موجه لك ..
كل شخص عنده اشياء يبي يغيرها بنفسه ويتمنى لو يقدر يعود نفسه على شي معين
ما قدر يستمر عليه “ مثل انه يشد حيله بالدراسه وهالموضوع مأزمني “ ، 
لازم نحط ببالنا ان كل شي نقدر عليه بس لازم نقتنع بأننا نقدر قبل نجرب .
قريت مره مقالة عن احد الدراسات اللي يسوونها عن تأثير النفس وكذا ،
الباحثين بهالدراسة طلبوا من احد المساجين اللي محكوم عليهم بالاعدام
انهم بيسوون دراسه عليه عن تجفيف الجسم من الدم ،
زي قولتهم انت مايت مايت بس حنا بنسويها بطريقة ثانيه وبيعطون اهله مبلغ وقدره
وافق السجين وجاء اليوم اللي محددينه ، ربطوه بكرسي وسكروا عيونه وقالوا اننا
بنحط انابيب عند مرفقيك يطلع دم من خلالها ومع الوقت بيجف دمك وبتموت وحنا
بنراقب هالشي ، وفعلا حطوا الانابيب لكن ما خلوا الدم يطلع من جسمه اصلا ،
خلوا يمر فيها مويه دافيه بدرجة حرارة الجسم وجابوا دلوين وحطوهم بالارض
بحيث الانابيب تنقط فيهم ، وعيونه مربوطه زي ما قلت لكم وبس يسمع صوت
المويه اللي على باله دم ينقط بالدلو ، ومع الوقت لاحظوا انه بدأ يجف لونه ويصفر
وعلى شوي شوي يزيد هالشي .. لما مات !!
متخيلين مات وهو ما تغير شي بجسمه وصحته تمام ، بس هذا التأثير النفسي وقوته .
واتوقع كلكم تعرفون الحديث الشريف “ لا تتمارضوا فتمرضوا فتموتوا “ ، 
اذا الرسول عليه الصلاة والسلام معلمنا هالشي قبل مئات السنين مو محتاجين دراسات
ولا شي عشان نقتنع بهالكلام .. خلاصة هذا كله لا يأثر فيكم الكلام السلبي
لا من الناس ولا من انفسكم . 
وسلمان العودة بالكتاب يقول “ الوسواس هو تخيل سلبي “. خلاص طولت عليكم ، بس يالله عاد خلونا نفكر بطريقة ايجابية .
ويالله عطونا رايكم بهالسالفه ،
تخالفوني أو توافقوني ؟
وأنتم من الناس اللي تأثيركم على أنفسكم قوي ولا لا ؟
لكم
|