السلام عليكم..
وماعليش على التأخير..
أبي أذكر لكم التفاصيل للفائدة...
1..بعد طباعة النماذج اللي بالموقع توجهت لإدارة التعليم وهم بدورهم أخذوا النموذج الخاص فيهم وأرفقوا نموذج تقييم مدير المدرسة ونموذج تقييم المعلم المتعاون مع خطاب هم سووه وموجه لمدرسة هم اختاروها لي كأفضل الموجود وإلا بإمكاني أختار غيرها...
2.. رحت للمدرسة وهي عبارة عن مجمع كامل وتوجهت لمدير الإبتدائية ورحب وهلا في ووداني لمعلم التربية الخاصة الموجود بالمدرسة وسلمني له واستقبلني المعلم بكل حفاوة وعلمني بكل التفاصيل وبكل المطلوب مني وبالطريقة وقال لي أهم شي عندي الفائدة الفائدة مهما كانت مدتها..وطبعا معي إثنين غيري يطبقون بنفس المدرسة لكن هم طلاب انتظام وراح يطبقون فصلب كامل وقبل أطلع من المدرسة اليوم الأول أخذت إسم المدير وجواله وإسم المدرسة وتلفونها وإسم المعلم المتعاون وجواله وعبيت نموذج بيانات الطالب اللي سبق طبعناه مع النماذج وأرسلته على إيميل المشرف وعلى طول وصاتني رسالة من إيميل المشرف بأن الإستمارة وصلت ..
3..تفاهمت أنا وإياه على أن التطبيق راح يكون 10 أيام فعلية فقط والسبب هو ظروف عملي وأيضاً هذي أقل مدة ممكن نطبق فيها حسب ما أفادني المشرف الخاص فينا بعد إتصالي عليه..
4..بدأت وجاب لي طالب صعوبات وعطاني نموذج إختبار تشخيصي علشان أختبر الطالب فيه وأشخص مستواه طبعا الطالب بالصف الثالث الإبتدائي سويت له الإختبار التشخيصي حق ثاني إبتدائي وطلع دمار فيه وعطاني نموذج اختبار تشخيصي خاص بالصف الأول الإبتدائي واختبرته وطلع فعلا مستواه الصف الأول الإبتدائي بسبب صعوبة التعلم اللي عنده...وسألته عن الإختبار النمائي هل نطبقه عليه قال لا..إلا إذا شفت أو حسيت الطالب مايركز ولا يعرف ولا يميز الألوان والأشكال وشكيت بوضعه تسوي له الإختبار النمائي قبل علشان تتاكد مايكون عنده مشاكل صحية ومشاكل بالنظر وغيره..
5..بعد الإختبار طلب مني أسوي خطة تربوية فردية لطالب تتكون من هدف بعيد المدى وتحته أهداف قصيرة المدى وتحت كل هدف قصير المدى أهداف تدريسية..وبدات بكتابة الخطة وبتوجيهات المعلم المتعاون حتى خلصتها كما هي مطلوبة.. وكان كتابة الخطة صحيحة وبطريقة صحيحة من الأمور المهمة جداً عند المعلم المتعاون..
6..بعد كذا قال لي فيه طلبة ندرسهم الآن صعوبات أنا والطلبة المتدربين..وطلب مني أحضر حصة مشاهدة عنده مرة وحدة وبعد كذا كل يوم يعطيني حصتين من حصص التدريس..
7..واليوم ولله الحمد كان آخر يوم لي خلصت وعبى لي نماذج التقييم الخاصة بمدير المدرسة والخاصة فيه هو كمعلم متعاون..وحسب سؤالي للمشرف عن طريقة إرسالها قال لي المشرف بعد ماتعبي النماذج ترسلها المدرسة من الإيميل الخاص فيها لي أو ترسلها أنت عن طريق إيميلك الجامعي..وأخذتها وسحبتها سكنر وأرسلتها له عن طريق إيميلي الجامعي..
وبالنسبة للي يسأل أطول فترة ممكنة للتطبيق أقول له حسب مدير المدرسة وحسب المعلم المتعاون وحسب ظروفك وحسب هل أنت تبي فائدة أكثر لأنه ممكن تطلب تطبيق فصل كامل بواقع يومين أو ثلاث أيام بالأسبوع حسب اللي تبي..
لكن حسب معلوماتي بأن الإدارات والمدارس تختلف وأيضا فيه مدير تعليم قال لشباب لازم الجامعة تكتب بالخطاب مدة التطبيق كم ماهو يكتبون عدد الساعات 60 وبس..وفيه مدارس راحوا لها شباب على أساس يطبقون أسبوعين بس وقالوا لهم لا تطبقون فصل كامل..
هذي شوية تفاصيل أحببت أن أشارككم بها من أجل الفائدة وأنا مستعد لأي سؤال أو فزعة..