المشاركة الأصلية كتبت بواسطة Reem.93

بما انك مستوى أول خذي نصيحة اخت لأختها لوجه الله

لو ما ذاكرتي من هالوقت بتجيبين العيد بالأخير

ما ودي اخوفك لكن أعجبني حرصك على المذاكرة وقلت بشدّ على يدها واعطيها هالكلمتين

طبعا انا كان مدرسني الرياضيات د.أسامه حنفي وكنت اتابع شرحه بطل بطل بطل بس سمعت انه غيروا دكتوركم صار واحد سعودي اذا أنه استاذ ملفي فـ هو يازينه خذيت عندة مادة اساليب كمية والله طيب ويفهّم عدلللل

اقتصاد جزئي اذا انه الهجهوج باقي فـ تراه تمام لكن ثاروا عليه الطلاب المستوى اللي طاف عشانه ما كرر لهم الاسئلة وصراحه عذرهم بايخ انا اعرف طريقة اسئلته والمادة ما يبي لها حوسه كلها قواعد وتنحفظ بتاخذينه على ترمين جزئي وكلّي .. وحتى هو اسئلته حلوه

قانون سهل سهل سهل ذاكريه من المحتوى مادة حفظ من قلب

مبادئ الادارة انا عن نفسي هضمت المادة وحليتها وجبت علامة كويسه لكن الكل يذمها يمكن لأنه الدوغان يحب اللف والدوران عشان كذا اقول لك احفظي المعلومة وافهميها لا تحفظين الاسئلة ترى يغير لكن اطلعي عليها اطلاع

المحاسبة د.علاء زهران كان كويس بس ندمت اني طبعت ملزمة ابوموزه من كثرها انخرعت خرعتن مب صاحية .. بس ينبلع لكني ماحبيت المادة




الحين اذا انك ساكنة بالدمام روحي مكتبة فجر واطلبي محتويات مستوى اول لإدارة الاعمال محتويات وليس ملخصات لييييس ملخصات .. وانتبهي للدكاترة اذا تغيروا او لا .. لا يجي واحد يعطيك ملزمة لدكتور قديم والا شيء

طريقة المذاكرة .. بما ان المواد كلها علمية يبغى لك تشغلين بعض المحاضرات اللي فيها شغل حسابي اكثر شيء المحاسبة والرياضيات
بالأول اقري المحاضرة بالملزمة واللي يصعب عليك ارجعي للفيديو وشوفي طريقة الحل

بعد ما تنتهين راجعي اسئلة المراجعة الـ20 سؤال واسئلة الاختبارات عشان تعرفين نمط الدكتور بالاسئلة .. من هنا للاختبارات تكونين سويتي تغذية لذاكرتك وصار عندك مخزون هالقد قدّه .. وياااارب تنجحين بأعلى الدرجات .

من بكرا ابدي أدرسي لكل مادة اسبوع ويمديك تشترين المحتويات بدري ان شاء الله

على فكرة اذا بغيتي أي شيء انا حاضرة لو تبين طريقة تعاليم الآلة الحاسبة وغيرها تحت امرك .. وقسمكم ان شاء الله يكفي ويوفي فيه كلللل المواضيع المساعدة .