جمعة مباركة على الجميع إن شاء الله

بسّ اللّي قالوا لي اليوم من الصبح

( أطلب من الله يجعل نصيبك مع شخص يسعدك طول عمرك)

بالله أش سوّيت لك عشان تدعي عليّ هالدعوة حرام عليك

طيّرت النوم من عيني إن شاء الله عدوّيني واللّي يكرهوني واللّي يبون بعد

هالسالفة ذكّرتني بسالفة ثانية صارت لي وأنا صغيرة ولـ الحين أهلي ماسكينها عليّ

جبت لجدّي الله يرحمه ماي وقلت له سمّ ياجدي

قال لي: سمّ الله عدوينك يا بنتي

عصبت عاد أنا وقلت له:الحين هذا جزاي أجيب لك ماي وتقول لي سمّ الله عدوينك سمّ الله عدوينك أنت

يعني من جد ليه يدعي على عدواني أش سوّوا له ؟!

المفروض يدعي على عدوانه ويخلّي عدواني في حالهم

ما أرضى عليهم عدواني وأنا حرة فيهم

خالصة ما في أمل مني بدّعت ما أسكت لين ينسون السالفة

إلاّ أدوّر لها تبرير وأحاول أمنطق التصرفات غير المنطقية اللّي أسوّيها

أصلاً لو بينسون السالفة نسوها من زمان

لمّا بدّعت هالإبداع كلّه كنت في أول إبتدائي وأنا الحين في الجامعة وللحين يذكّروني فيها

مو إن إبداعي خلاص إنتهى للحين عليّ حركات نص كمّ

بس هالسالفة سجلوها نقطة سوداء في تاريخي

أصلاً المفروض يعتبرونها نقطة بيضاء مشرقة في سماء إبداع إبنتهم تدلّ على عبقرية مبكرة تحتاج للتنمية والدعم

بس من يسمع ويقدّر للحين تذكرين لمّا قلت لجدك .... أي أتذكّر والله أتذكّر