2014- 12- 25
|
#9
|
|
متميز بمستوى أول -آداب-
|
رد: الاسرة والطفولة والآمال المقتولة ( موضوع تفاعلي )
وتوضح العالمة ( ايفيلين ديفال ) اول مرة اشوف فازلين ماركة تيفال
هذا الله يحفظكم العالمة فازلين تيفال ( حددت مراحل تطور الاسرة الى ثمان مراحل )
الاولى : مرحلة زوجين بدون اطفال حق المعاريس بدون بزران ما غير يترززون لبعض وكل واحد بيرضي الثاني وما غير تسمع سم ولبية ورغم انه تكون فيه مشاكل في العمل في الليل سهرانين وفي النهار مصفر للضحى اكيد بيحسمون عليه وماغير يهاوش في زملاه ما غطيتو علي السعتين هذي . والديانة حارقين جواله حرق فديت قلبه .
الثانية : مرحلة انجاب الاطفال والتوافق معهم وتوفير السكن المناسب لهم ومن مشاكل المرحلة هذي ماغير مشاوير للطواري لو تقرصها نملة قالت طاح البيبي وانت مدربي راسك ومن طواري لطواري لا وكله كوم والوحم كوم ثاني بالله وحدة تتوحم على ريحة كفرات سيارة تفحط هذي اجزم ان الي في بطنها درباوي هذي تولد في الاصلاحيه افضل من المستشفى.
الثالثة : مرحلة اطفال ما قبل المدرسة يكون فيها العيال من سنتين ست سنوات وتتميز هذي المرحلة بلاعنة الاطفال انواع التنكيد ما غيير يصيحون من دون وخاصة بالليل وانت سهران تنتظرة ينام وتصلي وفجر وترجع وهو ساكت يسمع صوت الباب قام يصيح . المهم هذي المرحلة يميزها الاهتمام بالاطفال والتوافق مع الحاجات الضرورية والاهتمام بفرص الترقي في العمل واذا غاب احد الزوجين او بالعربي الزوج يا ويلك ويا سواك ليلك
المرحلة الرابعة : مرحلة سن المدرسة وتتضمن التوافق مع توفير الحاجات الضرورية للابناء وتنمية علاقات مع عائلات من المرحلة نفسها والاهتمام بالتحصيل المدرسي . هذي المرحلة يا اخوان مرحلة المصلحة والنفاق اغث واحد في جيرانك يصير احسن صديق عندك ليه ؟؟؟ على شان بالله تكفى يابو فلان خذ خالد من المدرسة مع عيالك والا وصل خالد للمدرسة لني مناوب والله وانت قبل يدرس ولدك تشوف الموت ولا تشوفه .
المرحلة الخامسة :وهذي مرحلة المراهقين تقول الاخت فازلين تتزايد فيها مسؤليات الوالدين نتيجة لوجود المراهق واهتماماته . عز الله انها صادقة في المرحلة تترفع فاتورة الماء اذا كان المراهقين اولاد ما غير يتروشون لا ويتروشون باخلاص يعني يقعد يتروش ساعتين يالمعفن امس وانا اسحبك للمروش سحب وانت تصيح تقل تسيح مدخلينه المسلخ والحين ساكن تحت الدش اموت واعرف السبب .
المرحلة السادسة : مرحلة اسرة النشاط الحر التي يتولى فيها الوالدان مساعدة الاولاد للزواج والحصول على عمل وتبداء من مغادرة اول ابن للمنزل . هذي المرحلة طال عمرك مرحلة ان الولد يحب خواته وينفذ كل طلباتهم على شان يشوفون له وحدة حلوه وعلى يسالهم عن فلانه وعن فلانة وامس وهو يعاملهم مثل اسرائيل والفلسطينين . والبنت تحب كل حريم الجماعة وكل ما دخلت عجوز قامت ترحب وتهلي فيها وتهمز رجولها قمة النفاق واذا تزوجت ولدها طلعت براسها الف نخلة .
المرحلة السابعة : مرحلة زوجين في منتصف العمر التي يعود فيها الزوجان الى حياتهما الزوجية الاولى حيث يتقاعد احد الزوجين ويسميها البعض مرحلة العش الفاضي . هذي المرحلة يصير فيها الرجال نشبة وعلة نحر ما غير يهاوش ويجمع في ذي المفاتيح ويجمع في القراطيس والاكياس من غير فايدة وشغال تطفيه في لبمات البيت وانت جالس تذاكر ما تشوف الا النور طفى هههه وكل شوي مطلع حرته في الضيعفة الي معه . وخاصة اذا كان قبل التقاعد مسؤول عز الله انه بيطبق كل القوانين والانظمة فيههم
 ( ملاحظة هامة جدً : المرحلة الثامنة هذي جاية في الاختبار والله على ما اقول شهيد )
المرحلة الثامنة : الزجين كبيرا السن : اللذان يحتاجان الى رعاية من الاخرين او عندما يموت احدهما . المرحلة هذي تحس نفسك فيها قطعة اثاث قديمة بس انها غالية لا تنرمي ولا تنحط في مكان زين الله المستعان . يا اخوان اتقوا الله في ابائكم والله ثم والله انك ماراح تعرف قيمة تقصيرك الا بعد ما تفقدهم يا اخوان لا تعشيون الحسرة الي عشتها قبلكم والله اني نادم على كل ثانية راحت من عمري ما خدمت امي وابوي بحجة عمل او عيال او مشاغل حياة ولكن الحظيظ الي ابويه او احدهم عايش مفتوح له باب على الجنة مهما كان ابوك او امك متعب او متغير المزاج فهم كل شي في هذه الحياة خل زوجتك تزعل بكرة ترضى . المهم انا طلعت برا الموضوع ما عليه تحملوني .
اذا فيه اخطأ مشوها كتبتها ولا شفتها مرة ثانية
اخوكم ابو خالد
|
|
التعديل الأخير تم بواسطة ابو خالد الحكمي ; 2014- 12- 25 الساعة 05:21 AM
|
|
|
|