وش أشكي وش أخلي

على قولة المثل خلها في القلب تجرح ولا تطلع وتفضح

لكني هالمره بخليها تطلع وتفضح ولا ينجرح قلبي

وبقول لكم قصتي

أنا من قبل ما تبدأ الاختبارات بإسبوع
رحت وشلت فراشي وبطانيتي ومخدتي وملازمي واللاب<< كل عفشي

وطلعت من غرفتي عشان أفتك من أختي المزعجه واللي 24 ساعة تتشكى
مره من البحث ومره الدكتوره ما أدري وش فيها<< علت قلبي، وراسي صدع منها

واتجهت لغرفة الوالده لأن ما فيه أحد يجيها أبداً وأمي دايم تحت ووقت النوم بس تطلع،

المهم فرشت فراشي بالزاوية وحطيت ملازمي
ورتبت شنطتي (اللي بروح فيها للإختبار)
وشلت اللوحة اللي فوق الفراش وعلقت بدالها عبايتي .. يعني تجهيز كامل ..
حتى جزمتي (وانتم بكرامه) حطيتها عند الباب
عشان أتفرغ للمذاكرة وما أنشغل بأي شي ثاني<< وقت شد الأحزمة

طبعاً توني أقول بسم الله ببدأ أذاكر إلا أختي مدرعمه: ما شاء الله انتي هنا << لا هناك
وتكمل يوه غرفة أمي دفى<<أول مره تشوفها

وشوي يجي أخوي وأخوي الثاني .. وأختي وبعدها .. شرفوا كل العائلة
المهم ما كمل اليوم إلا وغرفة أمي صارت زحمه
ومن بعد هذاك اليوم وهم كل يوم لازم يتجمعون عندي

واحد طالع .. واحد داخل
واحد يجلس على السرير والثاني على الكرسي واللي على الأرض

ويعطونك سوالف مالها أول ولا تالي

الله وكيلكم تقولون حراج<< حتى صاروا يجيبون القهوه ويتقهوون عندي :cry111:

وأنا المسكينه أقضي طول اليوم وأنا أردد

اطلعي برا .. اطلع برا .. اطلعوا برا .. سكررروووا البااااب
ازعجتيني .. ازعجتوني .. أبي أذاكر .. أنتم ازعاج
يعني أرسب .. ترى برسب .. اتقوا الله فيني
راح المعدل .. طار المعدل .. بدعي عليكم في كل صلاة

وعلى هالموال كل يوم

وهم لا حياة لمن تنادي<< ما يرحمون

وتكون ردودهم على حسب شخصيتهم

اللي يقول:أسف مو قصدي أزعجك لكن ... ،
واللي يقول: أصلاً أنا مستقعد لك عشان ترسبين :s_45:
والثالث: ما أقدر أطلع لأنك بالنسبة لي الأوكسجين اذا طلعت أموت<< موت جدي إن شاء الله،
أما الأخير : أخس يا اللي تدرسين في جامعة كامبردج<<أشوفك متخرج منها

وكل مره يردون بنفس الصيغة ويغيرون الكلمات بس

طبعاً ما قلت لكم عن أمي اللي ما صارت تطلع من الغرفة مغير جالسه
وعلى هالجوال تراسل فلانه وترد على علانه وشغاله على هالقروبات
من مقاطع فيديو إلى صوت إلى تعليقات واسمعي ذا الضحك

وبعدها تبدأ حملة المكالمات تكلم خالتي وأختي وجارتنا
وأم فلان صار لي شهر ما كلمتها وأم علان خبري بها قبل 20 سنه خليني أشوف علومها

وإذا قلت لها شي تتمتم وتقول الحلال حلال أبوه والقوم طالبوه << ليييشش أنا بنتك هذا ظلم

فصار ما عندي وقت أذاكر فيه بهدوء

حتى الوقت بدل الضائع ..

تنشبلي خدامتنا البثره تبين غداء؟ .. لا .. تبين عشاء؟ .. لا .. طيب شاي؟ ..لاااا ، وش تبين؟؟ ..أبي أمووت

وإلى يومكم هذا والإضطهاد مستمر<< ما عندنا حقوق الإنسان

لكن الغريب اني وأنا أكتب لكم اللحين العائلة مالها حس مختفية << الله يشغلهم بأنفسهم

سببوا لي رعب وإنفصام في الشخصية << وش دخل الإنفصام

عاد أنا ناوية الإختبارات الجاية أحط لي خيمة فوق السطح وأذاكر فيها

يمكن أسلم منهم وأفتك من شرهم<< وأذاكر زي الأوادم

^
وبس خلصت المعلقة حقتي << يعني كلامي كثير