موجـود لكن كنِ ماني بموجـود
والنفس مدري صاحبي وش بلاها
،،،،،،
عـدا زمن مابين غايب ومفقـود
وأزريت أوصل ضيقتي لمنتهاها
،،،،،،
كِـن القدر يفرض على حلمنا قيود
وكِـن البشر تنكر عطا من عطاها
،،،،،،
ولـيه الوفى دايم نجازيه بجحود
ولـيه اتضايق لا لحقني غثاها
،،،،،،
حتى الشعر ماهو مثل ازرق العود
من بعد ماكان لطموحي رضاها
،،،،،،
اعوام مرت والقوافي بها ركود
وبنات فكري ماتحقق مـناهـا
،،،،،،
ماعـاد تغـريني ولا لـي اوجود
من يوم غابت واستباحت جفاها
،،،،،،
بنت تمس الحبل والحبل معقود
الـين حـل فـراقنا من خطاها
،،،،،،
والله ماتفرق عن العالـم بزود
العشق زينها وزود غلاهـا
،،،،،،
صبرت لـكن للصبر قـالوا حـدود
واتعبت رجلي في خطاوي خطاها
،،،،،،
قفت مـثل غـيمٍ سحب خيره الـنود
راحت وأنا ادعي ياعساها..عساها
،،،،،،
تعود مثل اول الا ليتها تعود
قبل الشكوك اللي تزاحم حشاها
،،،،،،
ياما نصحوني جازِ الصد بصدود
مـدام وصلـت في قساها مـداها
،،،،،،
قالـوا تناسـى ماورى الـمقفيـه فـود
وش لـون ابنسى مـن مـلكني هواها
،،،،،،
مـو مشكله لا شيب الـراس ياحمود
الـمشكلـة لا شـاب قـلبي وراهـــا