صرخة عتب
ياللي غلاك بداخل العين ما طــاح
متربعٍ بين الجفـــون وهدبهــا
أخذت معك أيــام والبــال مرتاح
ماكـدرت كثر الزوابــع طربهــا
واليـوم برق الصد في جــوّنا لاح
ونــار الفراق إبليس قرّب حطبـها
مدري وش اللي غير الحال ياصـاح
كاس النمـايم منهو اللي شربـها ؟
بعد الليـال الملح وعقود الأفـراح
خيمة عزا مابيننـا من نصبهــا ؟
قلت أتصبر عنك مير الصبر بــاح
مشــاعري حبل المودة جذبهــا
وكتبت فيك ابيات حلوات وصحـاح
نعمين بالمكتـــوب واللي كتبها
صرخة عتب قلبي من أسبابها ناح
هز الضلوع وطــاح باقي عتبها