سجد قلبي على رمل الضلوع وهزه التنهيد
وانا في جوفي خيام الندم والخوف منصوبه
يارب افهق هلاكي والمنايا والدروب بعيد
مادام المودماني للتراب تقوده دروبه
ياغياث الضوامي والثمام وجرهدي البيد
اعذني من جهنم والحشر والموت وكروبه
انا مانيب لامشرك ولافاسق ولاعربيد
انا اللي لا عصى واخطا تجهم واقلقه ثوبه
وانا اللي يرتجف مثل ارتجاف الخايف الرعديد
ليا شاف القبور الضيقات وحس بذنوبه
انا عبدك ولد عبدك وجداني هل التوحيد
خطاياي اخجلتني يالله الغفران والتوبه
انا الانسان حمال النقايض والكمد والكيد
غريق الطين واللذات من راسه لعرقوبه
انا عبدك ياربي وانت تفعل ما تشاء وتريد
سالتك يالله العفو العظيم وهين دروبه