السلام عليكم ورحمة الله وبركاته
حيّـاكم الله جميعاً في هـذا الموضوع الذي بتكلم فيه عن دراستي لتخصص تقنية الهندسة الكيميائية ، حبيت اشاركم خبرتي اللي اكتسبتها خلال الثلاث سنوات الماضية في كلية الجبيل الصناعية هذا الموضوع عشان تعم الفائدة للكل بشكل عام ولطلاب تقنية الهندسة الكيميائية بشكل خاص
الحمد لله تخرجت وبمعدل مرضيني ولله الحمد واستلم الشهادة ، و ناوي اقدم على برنامج البكالوريوس بإذن الله في الصيف القادم و يا رب انقبل فيه واكمل دراستي .. لا تنسوني من دعواتكم يا اخواني .
في هذا الموضوع بتكلم عن جميع المواد اللي درستها عن طريق طرح نبذه بسيطة لكل المواد في التخصص بالإضافة الى افضل المدرسين ونصائح مهمه قد تفيدكم في دراسة التخصص ... بحاول بقدر الامكان أعطيكم الزبدة .
أنصحكم بالاجتهاد والمذاكرة أول بأول وحطو براسكم أن المواد بتزيد صعوبتها مع تقدمكم في الدراسة ، يعني اول بلوك بيكون أسهل بلوك ثم في ثاني بلوك بتزيد صعوبة المواد بشكل اكبر من السابق وهكذا مع باقي البلوكات .
ملاحظه بسيطة : ممكن بعض المدرسين اللي درسوني ما يدرّسون نفس المواد اللي درستها معهم الان ، واحتمال يكون بعضهم جدد وما درسوني أو بعضهم قدامى واستقالو من الكلية.
غالبية المدرسين في قسم الكيميكال وفي الكلية بشكل عام ليسو دكاترة ، البعض يعتقد ان كل المدرسين دكاترة وهذا خطأ ، في قسم الكيميكال يوجد ثلاثة دكاترة فقط حالياً وهم : ( محمد شرف خان + ياسر هريدي + جوزيف آدم ) والباقين أساتذة غالبيتهم يحملون شهادة الماجستير و البعض بكالوريوس فقط وهم الاقل.
.
.
هذه المادة تتكلم بشكل عام عن أهم الركائز اللي لازم تتوفر في كل مصنع مثـل : المضخات و الصمامات و المبادلات الحرارية و السخانات والافـران
في هذا الكورس راح تدرسون كل قسم من هذه الاقسام بالتفصيل ، على سبيل المثال: في المضخات بتدرسون أهم أنواع المضخات ووظيفة كل نوع والفرق بين كل نوع وأهم الاجزاء التي تتكون منها المضخة .. ونفس الشيء مع باقي الأقسام
المادة هذه مهمه و من اسهل المواد اللي درستها ، وبإمكانكم الحصول على قريد عالي فيها
بالنسبة للمدرسين ، مثل ما ذكرت في بداية الموضوع انهم يتغيرون كل فتره وهذا الكلام ينطبق على كل المواد في كـل تخصص مو بس في تخصص الهندسة الكيميائية حتى في التخصصات الثانيه ، يعني مافيه مدرس متخصص بمادة محددة الا القليل ، لكن بعض المدرسين ثابتين كل ترم وما يتغيرون
في هذه المادة تحديداً انصحكم تقدمون وتبدّون مدرس البراكتكل (العملي) على مدرس الثيوريتيكال (النظري) .. خذوها قاعده عندكم الجزء العملي أهم من النظري من ناحية اختيار المدرسين يعني فرضا عندك ماده مدرسها حق النظري زين بس حق العملي سيء هنا انصحك تبديّ مدرس العملي على النظري لأن النظري تقدر تذاكره وتحل في الكويزات زين وتاخذ ملخصات اخوياك اللي عند المدرس الزين قبل الاختبارات وتجيب درجه حلوه بس العملي صعبه شوي بالذات اذا المدرس متشددأو فرضاً عندك ماده مدرسها حق النظري ممتاز والماده الثانيه مدرسك حق العملي سيء وبتضطر انك تضحي بواحد منهم عشان يضبط جدولك .. في هذه الحاله انضحك تضحي بمدرس النظري على العملي بس لا تخلونها قاعده عامه لكل المواد يعني المواد اللي ساعاتها عاليه مثل الكالكولاس والفيزيكسومواد التخصصالثقيله أو اللي عليها 4 ساعات ، في هذه الحاله لا تضحي بالمدرس اللي يدرس ماده وزنها ثقيل عشان ماده ثانيه مدرسها حق البراكتكل زين ووزنها 2 او 3 كريدت .. فهمتم قصدي !!
أفضل مدرس نظري للبروسيس اكويبمنت بالنسبة لي هو : شفـاعات [هندي] ومن بعـده محمد الزهراني .. وفيه مدرس اسمه سرحان البطي بس انه طلع يكمل دكتوراه برا وبيرجع قريباً ان شاء الله وعلى كلام الشباب اللي لحقو عليه كانو يقولون انه أفضل مدرس للماده وكذلك نصحو فيه لأي ماده يمسكها يعني لا شفت سرحان موجود خله اول خيار لك.
أفضل مـدرس للعملي من وجهـة نظري : محمـد الزهراني بدون منازع ولا تدورون غيره .. وسمعت ان فيه مدرس جديد اسمه أجيت [هندي] يمدحونه.
كيميكال إنجنـيرينق برنسبل:
هذه المـاده هي أساس التخصص ومن أهم المـواد في التخـصص إن لم تكن أهم ماده ولازم تكـون فاهمهـا زين زين عشان يكون أساسك قوي، لأن أكثر المـواد في البـلوكّات القـادمه تعتمـد عليهـا خصوصا دروس الـ conversion أو التحويلات ، وأقولها لكم بكل صراحه اذا ما فهمتم دروس الكونفيرجن بتتعبون مره في المواد اللي قدام لأن غالب المسائل اللي بتاخذونها في كل المواد بتكون فيها تحويلات كثيره وأي غلط بالتحويل بيخرب عليك المسألة كامله .. المادة هذي ما يدرسها الا طلاب الـ CHET فقط
بتدرسـون بشكل مفصـل انواع الوحدات وكيفية تحويل الوحدات ومسائل حسابيةأساسية بتـعتمد عليها في بعـض المـواد القـادمه وكذلـك انـواع المـتغيــرات (الضـغط ، الحـرارة ،المستـوى ، معـدل التدفـق) وكيفية تأثيرهم على العمليات الكيميائيةوكذلك انواع العمليات الكيميائية.
بالنسبـة للمـدرسيـن فهـم يتغيـرون كل تـرم وبالعادة ما يمسكها الا مدرس واحد بس لان ما فيها الا سكشنين بس ، أنا درستهـا مع د. زاكـر حسين [بنغالي] وللأسـف طلعنـا من المـاده بأساس ضعيف وتبهذلنا في المواد اللي في البلوكات المتقدمه خصوصا في المسائل التي تعتمد على تحويل الوحدات ، حالياً الدكتور هذا غير موجود لأنه استقال من الكلية .. عندكـم محمد الزهراني و سرحان البطي كلهـم قد مسكو هذه المادة وكانو ممتـازين فيها ... حالياً اتوقع هريدي هو اللي ماسكها والله يعين اللي يدرسونها عنده.
أول كـورس إنقلش بالتخـصص ، وبينصب التـركيز فيه علـى تطويـر مستـوى الطـالب في الكتابة فقـط ، على سبيـل المثـال بتتعلمون كيفيه كتـابة القصص و وصـف الصور و شـرح الخـرائط والمقـارنة بين شيئيـن والتعبـير عن الـرأي في موضوع معيّن.
بالنسبة للمدرسيـن ، عنـدكم شون يات [بريطاني مسلم] مدير المادة والمسـؤول عنها وكل تـرم يدرسها ويعتبـر من أفضـل المدرسيـن ، وكذلك سجـاد أحمد [باكستاني] يـدرسها وشرحه بطـل ويدف درجـات ، وكـان فيه واحد ممتـاز اسمه تومـاس مايكـل [امريكي] بس ترك الكليـة قبل فتره.
مـاده عمليـه سهلـه بتتعلمون فيهـا ثلاث أشياء اساسيه ، بتتعلمون كيـف تسوون صنـدوق معدنـي + كيفية قـص وبـرد قطعه حديد بشكـل دقيـق حسب الموصفات اللي يطلبها المدرس + كيفيـة قيـاس أطوال أي جسـم باستخدام أداة تسمـى "كاليبر" وهـي اداه قياس مثل المسطرة ولكنها أدق وبتعطيك القيـاس بالجزء من الملي ، يعني لو تقيس جسم بالمسطرة وطلع طوله 50 ملم وقسته مره ثانيه بالكاليبر بتطلع لك القراءة الادق ولنقل على سبيل المثال 50.17 ملم
بالنسبـة للمدرسين فهـم كُثر لكن أفضلهم : بنـدر المقاطي+ هيثم أبو جبّه [أردني] + حمدان الدوسري
بتتعلـمون في هذه المادة طريقة رسـم الاجسـام بالقلـم الرصاص على لـوح الرسـم ، لان فيـه ماده ثانيه يأخذونها طلاب الميكانيكا حقت رسـم ولكن عـن طريـق الكمبيوتر . اما هذي المادة عن طريـق لوح الرسم وقلمي الرصاص بنوعيه الـ (h2,hb) والادوات الهندسية الاخرى مثل المثلثات والفرجار
بالنسبة للمدرسيـن هم بالعادة نفـس مدرسين الورك شوب ، الأفضل بندر + هيثـم + حمدان
أثقـل مـاده بالبلوك الاول واذا بـدعت فيهـا بتجيب معـدل عـالي .. بتدرسون في الكالكولاس حاجتين أساسيه بالتفصيل وهي الديريفتف (التفاضل) قبل الميدتيرم و الانتقريشن (التكامل) بعد الميدتيرم .
المدرسيـن كثيرين وأكثرهم ممتازيـن مثل : (أحمد خان + راو + قمر خان - هنود )+ (الطحاينه + وائل أميـن – اردنيين) + صالح الحميدي ، وكلهم دكاترة .
شخصيا أنصح بـ أحمد خان أو راو أو صالح الحميدي أو قمر خان
مـاده مهمـه جداً وتأثر على المعدل بشكل كبيـر ، بتدرسون الكيمياء بشكل عـام : الجزيئات والذرات الأيونات والجدول الدوري والعناصر والمركبات والمخاليط وأنواعالتفاعلات وطريقة تسميه المركبـات و مقدمة في الكيمياء العضويه .. الخ ، باختصار نفس دروس الثانوية .. المادة هذه بتفتح لكم ماده في البلـوك الثاني وهي أورقانيك كيمستري 1 .
أفضل المدرسيـن من وجهة نظري :
النظري كلهم نفس المستوى : د. جيموه تيجـاني [نيجيري] + د. محمـد شريـف [عراقي- بريطاني] .. أنا درســت عـند د. محمد شريف لكن مـره غـاب وجاء مكـانه د. تيجــاني وشـرح لنـا وحسيـت أن د. محمد شريف افضـل بشوي ، يمكن لأنـي تعـودت على أسلوب محمد شريف.
العملي : عبدالرشيـد [سيريلانكي] هو الأفضل + جـلال [سعودي] .. كلهم ممتازين وبنفس المستوى بس اني افضل عبدالرشيد ... أهم شي لاتاخذون محمد شريف عملي لنه متشدد شوي بالدرجات والتقييم.