مرثية للملك عبد الله

الليل ماهو السواد ولا الدمع مالح
كل السواد اجتمع والمر فـ فراقك

مات البياض ودفنا الناصع الواضح
ياصبح وين الصباح ونور مشراقك

ياضي أبو متعب وياشمسنا البارح
غابت وطفت سناها داخل أعماقك

والله مادري قعدت وسيدي النازح
وإلا نزحت وتركتك بين عشاقك

لا تحسب إني الجريح وفقدك الجارح
كلي بعض لوعتك أو بعض أشواقك

الناس قبلي وبعدي ذاهل ونايح
ليلة طويت السما غمضت أحداقك

ياغيمة الطيب يابرق العطا اللايح
كل الجزيرة بكت عشبك وأوراقك

وإن كان شرب الثرى من عطرك الفايح
فوق الثرى منشرب عطفك وأخلاقك

يارب تغفر ذنوب الحاكم الصالح
الموقن الواثق بعدلك وإشفاقك

وتجعله يوم الحساب الفايز الرابح
عبدالله اللي رضا جرحك وترياقك

وياليلة الحزن يا وجه الأسى الكالح
لو هو بيدي مافتحت يديني لعناقك

أكتب قصيد أرثى من رايح لرايح
ياسكرة الموت كل الخلق ذواقك

الله يرحمه ويغفر له

بدر بن عبد المحسن