ملتقى طلاب وطالبات جامعة الملك فيصل,جامعة الدمام - عرض مشاركة واحدة

نوف بنت سعود · #1 2015- 4- 20

حاجات بسيطة في الاحصاء الاجتماعي في المحاضرات الاولى.........

التعاريف الاولى كلها سهلة وماعليها ان شاء الله ,,,

المحاضرة الثالثة..اللي نسميها النزعة المركزية وهم 3 اخوات انا واسمي المتوسط او الوسط الحسابي واختي سميتها نوال منوال والثالثة سميتها ريم وهي وسيط وعلى نفس وزنها...
الاولى اللي انا ,,,الوسط كيف اطلعه ؟؟ اجمع كل الاعداد او القيم واقسمها على عددها مثال 26354 =نجمعهم تصير 20 نقسمهم على 5 لانها عبارة عن 5 ارقام....الناتج 4 يعني المتوسط 4

نوال او المنوال سهل اللي هو اكثر واحد تكرر مثال 22345677 ....المنوال عندنا رقمين 2/7
واذا ماتكرر يصير عديم المنوال واذا تكرروا كلهم مثال 22334455 يصير بعد عديم المنوال

الوسيط اللي هي ريم عاد هذا الرقم اللي في الوسط يصير هو الوسيط اذا صار فردي نرتبهم تصاعدي وناخذ اللي في الوسط مثال 4328795....بعد الترتيب تصير 2345789 الوسيط اللي هو 5

اما اذا صارت الاعداد زوجية ناخذ الرقمين اللي في الوسط ونجمعهم ونقسمهم على 2 مثال 435729....234579 اللي في الوسط 4 و5 نجمعهم تصير 9 ونقسمهم على 2 تصير 4 ونص الوسيط 4ونص

اذا جاء سؤال كيف احسب الفئة الوسيطية او احددها ...؟؟؟
اول شئ نحسب نص مجموع التكرارات ...يعني لو عندي 4 فئات والفئة الاولى تكرارها 14 والثانية 29 والثالثة 18 والرابعة 9 اجمع هالتكرارات تصير 70 نصفهم 35 وهذا اللي نبغاه نصف التكرار .....بعدين نحط في مخنا العدد صفر ونضيفه على الفئة الاولى اللي هي 14 بيساوي 14 نفسها ماتغير شئ و14 اقل من نصف التكرار اللي هو 35 واحنا قانون حق الفئة الوسيطية يكون مساوي له او يزيد عليه و14 اقل من 35 يعني ماينفع ,,,,نقوم نزود عليه الفئة اللي بعده اللي هي 29 ونجمعها مع 14 اللي هي الفئة الاولى تصير 43 وهالرقم اكبر من 35 معناه الفئة الثانية 29 هي الفئة الوسيطية ...

القاعدة اللي بعدها ....اذا شفتوني انا الوسط الحسابي اكبر من خواتي معناه منحى ملتو لليمين واذا شفتوا نوال هي اكبر مني معناه منحى ملتو لليسار ...
فاذا كان مثلا الوسيط 85 والمنوال 80 والوسط الحسابي 95 معناه انا اكبرهم يعني منحنى ملتو لليمين

مقاييس التشتت ... كل ماقل التشتت كل ماقربت من المتوسط كل ماتجانس

المدى كيف اطلعه ....اطرح اقل قيمة من اكبر قيمة ويطلع المدى مثال ....4326349...اطرح 2 من 9 =7 اذن المدى 7
هذا نطلعه في البيانات الغير مبوبة
اما المبوبة ...اعلى فئة واقل فئة نطرحهم من بعض ...

الانحراف المتوسط نوع من مقاييس التشتت بعد المدى .....
كيف نطلعه ؟؟؟؟
اول شئ نطلع الوسط الحسابي وطبعا عرفتوا للوسط الحسابي..
بعد مايطلع الوسط عندي وراح يكون رقم ثابت اقوم اطرحه من كل قيمة من القيم
مثال ........
15 13 3 5 15 12 18 6 7 3 اجمعهم واقسمهم على عددهم يساوي 9.7 خلاص الحين هذا الرقم ثابت بطرحه من كل رقم فوق ...وبيطلع لي الجواب
5.3 3.3 _6.7 _4.7 5.3 2.3 8.3 _3.7 _2.7 _6.7 طبعا بتلاحظون ان بعض الارقام فيها علامة السالب قبلها وهذا لاننا طرحنا صغير من كبير ...عادي
المهم لو تجمعونهم بيطلع الناتج صفر وهذا اسمه مجموع الانحرافات =صفر
عشان كذ ا نطلعهم للقيمة المطلقة اللي نفس الرقم بس بدون علامات قبلها
ونجمعهم ونقسمهم على عددهم ....يطلع لنا ان الانحراف المتوسط هو متوسط القيم المطلقة للانحرافات...يوم جمعناها طلع 4.9 وفيه مثال ثاني جوابه 2.64 طبعا المثال الثاني اقل تشتت لانه اقل رقم ...
وكل ماصار الجواب اقل معناه اقل تشتت

وبكرة ان شاء الله نكمل ....كان فهمتوا علي