ملتقى طلاب وطالبات جامعة الملك فيصل,جامعة الدمام - عرض مشاركة واحدة - مساعدة يا اصحاب تخصص الانجليزي

ضاعت سنين · 2015- 4- 27

اقتباس:

المشاركة الأصلية كتبت بواسطة المربع

شوف أبوي .. المعهد لا تفكر فيه وخصوصا ( عندنا ) بالبلد .. لأن شغلهم استنزاف مادي بإسم التعليم والتعليم في جهه وهم بجهه .. كثير من الشعب هنا عنده قناعة راسخة بمخه ومدري مين رسخها . إنه أول مايدخل باب المعهد راح يفتحون راسه ويجيبون جركل مليان خلطه لغة إنجليزية بروفيشنال ويفرغونه بدماغة ويسكرون مايطلع من الباب إلا وهو صاير ينافس الأمريكان !
السالفة أبدا ونهائيا ليست كذلك .. الموضوع ومافيه شي واحد ألا وهو ( الدافع ) ( الدافع ) ( الدافع )
لو ماعندك دافع وحماسة وهمه وإصرار تتعلم هاللغة وتمارسها والله لو تطق بذا المعهد عشر سنوات لتطلع بلوشي ولا استفدت .. ونعرف ناس كثير طلعوا ابتعاث ورجعوا لو تسأله سؤال جدا بسيط باللغة الانجليزية جلس يتعتع وماعرف يرد وما أقول كلهم لكن أبين لك الوضع

انت تقول ماعندك وقت ووقتك ضيق ومدري وشو , فيه اقتراحات جدا مثاليه بالنسبة لك وتناسبك إذا مصر على سالفة المعهد . عندك معهد افتراضي شهير اسمه ( انقلش تاون ) .. هذا فكرته الله يسلمك اعتقد الكثير يعرفها تشترك معهم أول شهر ب 1 دولار ( دولار واحد ) , يقولون جربنا لمدة شهر كان انزنا لك ولا اطلع ويادار مادخلك شر .. أول شي يعطونك اختبار تحديد مستوى .. بحيث يعلمونك وين مستواك ومن وين أفضل شي تبدأ
بعد كذا بناءا عليه يبدأ تعليمك معهم .. نظامهم جيد جدا بأسلوب التدريس بحيث يوصلون المعلومة بكل سلاسة
وعندهم نظام الدردشة الصوتية تدخلها بأي وقت باليوم شغالة 24 ساعة إنت بس متى ماتفضى إن شاء الله آخر الليل . تدخل تحصلهم .. طريقة هالغرف تدردش مع مدرسين أجانب وطبعا باللغة الانجلزية وياخذ ويعطي معك ويحاول يصحح لك وعااادي جدا يتقبل أخطائك ويعدلك .. أن أتوقع هالنظام مره ممتاز للناس اللي يبون ممارسة لغة وتطوير .. عاد هذا أشهر معهد موجود وفيه غيره والحلو إنه بعيد عن الاستغلالية الموجود بالمعاهد لدينا مع الأسف

واللغة مثل ما قلت لك تبيلها ممارسة وتعلم وتطوير وعدم ملل أو كلل من هالشيئ وهي مهاره مثلها مثل قيادة السيارة أو الطقطقة على الحاسوب وو الخ كثير أمور ماكنت تعرفها وبمجرد إنك مارستها .. يوم ورا يوم تلاقئياً لقيت نفسك بارع وماهر

اتمنى اني قلت شي مفيد . والله يوفقنا ويوفقك

بس أحس مهما كان استنزاف مادي في معاهد اتوقع والله العالم بتفيد في اللغة لو بالشي البسيط , وهالشي البسيط ممكن يختصر لي مسافة تعليم ماعتقد اتعلمها لوحدي

وحلوة جداً اقتراحاتك .. خاصة نظام معهد انقلش تاون ونظام الدردشة 24 ساعه ,
بس المشكلة كيف بكلمهم او اتفاهم معهم وانا جملة ماعرف اركبها

ولا برايك احفظ كم كلمة تفيد ثم افكر فيه .!
والشي الثاني في شروحات اشوفها باليوتيوب بس كلها أنقلش × أنقلش مدري كييييف بفهم منهم صراحة ؟!

ومشكوور على النصيحة الطووويلة والأكثر من مفييدة