|
رد: هـل فعلاً نحن متـخلفون .!؟ أم أنها مؤامرة كونيه !
تدري وانا اختك من اللي فشلونا ؟
اللي تعودوا على التذمر من بيئتهم واعماهم التحضر بالطريقه الغربيه
وصاروا شواذ باخلاقهم وخلقتهم .. و ياكثرهم اللحين !
انت تبي راي صريح ماتبي احد يجاري فكرك النقدي ..
اذا عندك مشكله او ظاهره حط نفسك بموقف كل طرف من هالمشكله
لاتمسك جهه وحده وتكون "سطحي"
ال criticism مادرسنا به كذا !
وانا اخبر اللي يسافر ويروح سيرلانكا يصير منظوره واسع مو ضيق ؟
# الدله :
لما اجلس قدام جدي وهو يلمع دلال الرسلان ويعلمني هالشغله
وهو يشرح لي تاريخ كل قطعه .. وهذي دله امه المفضله ووو ويقولها بنبره الم !
ويرتبها ويصفها فوق المشب
وتدخل عليه انت وتقول وش ينفعني شايب مجمع ميه دله عنده ؟
معليش اسمحلي انت اللي مالك نفع عند هالشايب ..
يحب يقتنيها ، هوايه ، ذكرى ، رمز للكرم
وش ضرك هالشايب ؟
# البشت :
انا شخصيا اشوفه لباس تقليدي ، يلبسه عندنا كبار السن والمعرس بحفل زواجه
وحاجه جميله و مميزه تميزهم .. لها رزه وهيبه في مناسبتها
هل المعرس اذا لبس البشت يعني باقي الرجال ناقصين ؟!
تراي اشوفها مثل التاج والطرحه عند العروس 
اما بالنسبه للامراء ما اشوف الكل يلبسه و اليوم شايفه امراء الامارات لابسينه ..
#الابل :
عشق البدو ❤️
تأملها عباده ، وحليبها عافيه
تسلي كبار السن اللي يحسون انهم في وقت مو وقتهم
والحمدلله نملك ابل وغنم وفرس وكلهم نعم ربي
المزايين اللي صاير
اشوفه كأي مسابقه تصير وكل دول عالم يسوون مسابقات !
المشكله هنا في التصرفات المقيته اللي تصاحبها - هنا معك حق -
وانا اشوف انو صار فيه شوي وعي بهالامور .
مثلا : اهلي يسسون اجتماعات للعائله كلها
وتكون بالبر عند الابل .. يصير فيه ملتقى ويتعرفون الاطفال
ويشوفون كيف اجدادهم الاوليين عايشين ..
وبنفس الوقت متفقين مع احد الجمعيات يرسلون سياره تغلف باقي الاكل بدل رميه ..
وهالعايله بينهم مبتعثين و دكتورز و مهندسيين و مترجمين لفوا العالم ولا انكروا اصلهم و هويتهم
نصيحتي : في مثل هذي الامور اللي تمس هويتنا حلو اننا نلمس الخطأ ونصلحه ، نوعيي اهلنا ومعارفنا
الحل ماهو في اعدامها من جذورها .. الحل بالاصلاح .
مامن مؤامرات في الموضوع ، والتخلف نعالجه مع بعض بالتوعيه
و قواك الله 
|