تذكرون سالفة تجارة الايسكريم !!!!
ذاك الولد فتح مشروع غرفه في بيتهم وحطها دكان ( بقالة ) يعني وسع المشروع وحطه في بيتهم خايف يحطه بالشارع واشاركه الربح ..
وكان مصروفي المدرسة يا ريال او ريالين يعني على حسب كرم الوالد الله يرحمه ذاك اليوم،، او الصرف الي معه
المهم كان يكفيني ولكن اذا ريالين افرح كنت اوفر ريال علشان اشتري فيه العصر من دكان صديقي .. لأن البقالة ابوي مايعطينا فلوس يخلينا نسجل بالدفتر ويحاسب اخر الشهر
وتخبرون حريم اول مايعطونهن ازواجهن مصروف .. والله ماادري بس لو عندهن مصروف عطونا لأن الام رحيمممه مره .. تهقون ابوي كان يعطي امي مصروف وهي ترص بالدراهم وماتعطينا ،، تخيلو .. لازم اسأل اميمتي هالسؤال علشان اذا كان لها مصروف فهي مدينة لي بجزء من الي راصته عندها هههههههه
نرجع لدكان صديقي وسع المشروع ويبيع بساكيت وحلاو مصاص وميراند و ( اورنجينا ) و ( راني ) وببسي .. غير الايسكريم بالفيمتو والسنكويك وزاد ترمس يسوي فيه عصير فيمتو ورابط كاس معدن بخيط في زر الترمس ونعطيه ريال ويصب لنا بالكاس ونشرب كلنا يابنات وعيال الحارة وراء بعض بدون يغسل الكاااااس ( ووووووووععععععععع ) كبدي توجعني كل ماذكرت اني اجمع فلوسي واحرم نفسي بالمدرسه علشان اشرب سوور وريق الوراعين ~~> للأمانه ماعلمت عيالي ولا ابوهم عن هالقرف علشان مايتبرون مني ههههههههههههههههه
ودي اوريكم الفريزر حاليا ثلجت لهم فيمتو ويقولون ياقدمك ياماما
قديمك نديمك ~> قديمي فيمتو ههههههههه
على فكرة صديقي ذا صار ( خوي مع امير ) كان مخه دراهم ماشاء الله .. الله يبارك له
واجه ابو عيالي وقال وشلون بنت فلان والنعم فيها ~> ليه والنعم بسس علشان شاركته بحلاله وسرقته ووريته نجوم القايلة .. وكنت اضحك عليه كان اقصر مني . مادريت اني بثبت بمكاني وهو بيزود مترين هههههههه
بقلـــQueenـــي