كثير من طلاب الإنتساب ماهمه غير الورقة اللي بياخذها عند التخرج
ونادر يكون طالب الإنتساب همه شهاده حقيقية وتحصيل علمي مفيد
وإذا وافقتني الرأي فأنت من النادر وإذا زعلت تراك من الكثير
وانا من جاور القوم وصرت من الكثير
وإذا تخرجت إن شاءالله أشوف معهد أو شي ادرس فيه صدق مو بكش
وطالب الإنتظام بكل تأكيد ومافي أحد عاقل وفاهم يقدر يقول إن دراسته
أقل أو تساوي دراسة المنتسب
الفرق شاسع لأن تعامله مع العلم مباشر وتفاعله مع الأستاذ حقيقي
وأنا مجرب دراسة الإنتظام في كلية المعلمين سابقآ وماالله وفقني
أما المنتسب وخصوصآ في الملك فيصل والغالبيه
حده نماذج الإختبارات السابقه قبل الإختبار ب ساعه ومبروك ال a+
وإذا زعل المنتظم إني بأنافسه على وظيفته وهو عارف الحقيقه فوالله من حقه
ولأجل تعرف عقلية (بعض) طلاب الإنتساب كيف بعيده كل البعد عن عقلية الطالب الجامعي
إذا جاء إختبار مو من النماذج السابقه تحصله يسب ويلعن ويقول إحنا طلاب إنتساب
وإحنا مساكين وظروف وبزارين وشغالتنا شارده ووو .. وليش مايقدرون ظروفنا وإننا مو إنتظام..؟!!
أو العينات اللي يسألون بالمباشرة (يادكتور بتكرر أسئلة العام ..؟!)
وإذا تخرج وحس بفرق بين شهادته وشهادة الإنتظام كمان يسب ويلعن وليه يفرقون بيننا
موكلنا درسنا وتعبنا وبالعكس إحنا درسنا رغم الظروف وقهرنا الصعاب ولحسنا أم المناهج لحس
ونتحدى طلاب الإنتظام بالعلم ......... وإلخ
وأنا ماأعمم بكلامي هذا على كل طلاب الإنتساب وبالعكس كلامي هذا إنصاف حتى للمجتهدين
من المنتسبين اللي داخل الجامعه لأجل العلم والفائده الشخصيه وطموحه بشهادة يحملها بكل
أحقيه
لكن لما يشوف مستوى التحصيل العلمي للخريجين اللي معه يحس إن شهادته أي كلام وأكبر
دليل إن الجامعه اللي بتخرجكم ماتقبلكم في دراسة الماجستير لأنهم أكثر ناس عارفينكم
طيب هذا المسكين المجتهد اللي يذاكر ليل نهار مو ظلم إنه مايقدر يكمل ماجستير في نفس
الجامعه بسببكم ..؟!
عاد ياأبونماذج إزعل ونط ولا أقعد ترا هذا الواقع والغلط من الجامعه مو منكم لأن طريقتها أصلآ غلط في غلط
وأي شخص عارف نفسه ويشوف إن الكلام هذا ماينطبق عليه وإنه مانجح وأخذ الشهادة
الا وهو يستحقها بكل ماتعنيه الكلمه
فإنت على راسي والله وأتوقع لو الله ييسرلك الأمور إن شاء الله راح توصل للدكتوراه وأنت
المثابر الحقيقي اللي تستحق الإحترام .
أما أنا على وشك تخرج ومعدلي في حدود ال 4.33 مع مرتبة الشرف الثانية إن شاء الله
ويشهد الله إني مااعرف أكتب كلمة يس ونو الا بعد مااعصر مخي واتذكر هي كيف تنكتب
والفائدة الوحيده اللي بأطلع فيها غير الشهاده هي مهارة الإستماع والفهم فقط لاغير .
وبالنسبه للوظائف التعليميه من الظلم حرمان المنتسبين من المنافسه عليها لكن
لو فتحوا المجال لهم أتمنى من كل قلبي إن تكون فيه إختبارات عادله ومنصفه تفرق
بين الجامعي الحقيقي والمزيف
وإنت يامجتهد إذا إنك عارف إن كلامي صحيح لكن تمنيت إني أسكت عشان لاأحد يدري عن الواقع
ترا وزارة التربية وأمثالها ماقفلت خشمها الا لأنه من زمان وريحتنا طالعه .
والصدق مايرضي أحد غير صاحبه .