اول شيء مبروك قبولك الجامعة و الله يعطيك خيرها و يكفيك شرها.
انا هالسنة خلصت تحضيري و تخصصت و لله الحمد .. فبقولك بحكم تجربتي:
انصحك أول شيء أنك تحددين في بالك من اللحين وش التخصص اللي تبينه عشان تسعين لتحقيقه و أنتِ مرتاحة وما تكونين ضائعة ولا تدرين وش تسوين .
التخصصات اللي عندنا هي ( الدراسات الاسلامية - اللغة العربية - اللغة الانجليزية - تاريخ - جغرافيا ونظم جغرافية - المكتبات - الاعلام وتقنية الاتصال - علم الاجتماع والخدمة الاجتماعية ).
انصحك قد ما تقدرين حاولي تأخذين المواد أول بأول ولا تأجلين شيء لأخر سنة .
الترم الاول فيه تسع مواد وهي ( التحرير العربي - نحو1 - النظام الاجتماعي في الاسلام - مدخل الى تقنية المعلومات - فقه السيرة النبوية - انجليزي عام - صحة و لياقة ) هذي كلها سبع مواد, يبقى لك مادتين أنتِ مخيرة فيها , اللي هي ( علم اجتماع + احصاء ) أو ( مهارات التفكير + مبادئ الادارة ) تختارين وحدة من المجموعتين وتدرسينها مع السبع المواد اللي فوق .
المواد كلها تأخذينها مرة وحدة في الاسبوع ما عدا الانجليزي تأخذينه مرتين في الاسبوع .
الترم الثاني ( نحو 2 -تلاوة و تجويد - انجليزي كتابة - انجليزي قراءة - تذوق ادبي - قراءة و محادثة– برامج الحاسبالمكتبية ) وطبعاً تضيفين عليها مادتين من المجموعتين اللي ذكرتهم فوق .
وبس اتمنى أنك فهمتي علي ,,