لاضاق صدرك عالي الصوت جره
لوكان قلبك مايطاوعك مسرور
دنياك لو تسوى من الحزن ذره
ماكان تاليها توابيت وقبور
وماكان للكافر بعمره مسره
وماشفت في ملكه ملايين وقصور
العمر يمضي بين حلوه ومره
والموت حق وقابض الروح مآمور
دام الحياه الفانية مستقره
ورزقك يجيك وبين الآجواد مستور
لاتنشغل بالوقت برده وحره
وآحذر تصير بقسمة الناس مقهور
وحكم القدر لاجاك خيره وشره
آشكر عظيم الشان والذنب مغفور
والمجلس اللي يزعجك لاتمره
خله تراك بشوفته منت مجبور
والرجل سقها في صحاصيح بره
ومد النظر مابين ريضان وزهور
لاصار وجه القاع مافيه جره
والمشي حافي والثرى تو ممطور
ساعات صمت ماوراها مضره
تسوى الكلام اللي به اذنوب واشرور
اطلق خيالك واترك النفس حره
وخل الطبيعه في حياتك لها دور
وبالليل لا بانت نجوم المجره
آذكر بديع الخلق بـ احساساس وشعور
واسجد لرب الكون مره ومره
وآحفظ لسانك وآترك الكذب والزور
وفروض ربك خلها مستمره
وطاعتك لايدخل بها نقص وقصور