2015- 8- 22
|
|
أكـاديـمـي
|
|
|
|
نصايح للطالبات المستجدات لبداية موفقة بأذن الله ..
أولاً . بسم الله والحمد الله والصلاة والسلام على أشرف الانبياء والمرسلين سيدنا محمد وعلى اله وصحبه أجمعين .
ثانياً , احب اهني وابارك لكل من تم قبوله هذي السنة وحظ اوفر لمن لم يحالفهم الحظ 
ثالثاً , كل وحدة تفكر بشيء سلبي رجاءً تغيره , وتهيأ نفسيتها للحياة الجديدة , توكلي على الله بكل شيء , حاولي تقرين كثير عشان المخ يستوعب ويستقبل معلومات لان اكثر شيء عانينا منه هو ان قلة القراءة و عدم الصبر , عموماً مافي اختلاف كثير عن المدرسة الا باللبس و الاعتماد على النفس , والجدية الجدية بكل شيء ..
مالكم بالطويلة , اكيد كل وحدة شايلة هم كيف تتقبل هالسنة وكيف تبدا ؟ وكيف تتعامل مع الطالبات والدكاترة ؟ وكيف اجواء الجامعة ؟!!!
من ناحية انك انقبلتي لحالك بدون صديقاتك , هذا شيء عادي جداً كثير كثير انقبلوا ولا يعرفون احد بتاتاً ومع الايام والوقت تأقلموا نصهم شهر ونصهم ترم ونصهم سنة كاملة كل وحدة وتقبلها وكذا ولا كذا هذي الحياة تجمع وتفرق وكلن بيشوف طريقه ,
واللي معها صديقاتها حطوا ببالكم انه كفاية لعب ايام الثانوي و تكاتفوا على الجدية بكل شيء , اذا انتي حاطة ببالك تبين الدراسة وتفكيرك بالمستقبل بتنجحين وبتعدين هالاشياء ربي بييسرها لك , اما اذا حابة تغيرين جو اول سنه ولعب وكله نايمة فأنا اقول سلام على مستقبلك ودراستك كملي نوم 
لان التحضيري مهم تجيبين معدل متوسط وكويس عشان التخصص والتحويل للي حاطه ببالها كلية معينة وتخصص معين .
- من ناحية الحياة الجامعية -
بشكل عام , الشيء الجديد هو انك تعتمدين على نفسك بكل شيء مثل تسجيل المواد , مراقبة نفسك ودراجتك , اثبات نفسك بكل محاضرة تشاركين و تتحاورين , الصمت ما يجيب شيء ابداً , خلي كل شيء اول بأول الواجبات والبحوث والعروض , لاتخافون مو اسبوعياً بحث و واجبات اما المواد فأغلبها متكرره الدروس كلها تبع المتوسط والثانوي مع تكثيف المعلومات , مافي شيء جديد الا كم ماده , مثل الصحة واللياقه , ومهارات التفكير , ومبادى الادارة , طبعاً اتكلم على التحضيري مو التخصص 
من ناحية البنات وتعاملهم , صراحة جداً متعاونات تبين شيء تستفسرين على شيء بالخدمة يساعدون ويفيدونك ببعض الاشياء , ويرجع لكل وحدة واخلاقها وتعاملها مقدر احكم على كل وحدة بالجامعة بس بشكل عام تقريباً , يعني لاتحاتون من هالناحية وريحوا انفسكم .
- من ناحية الدكاترة -
, - اختصارها اصابعك مو سوا - في منهم الزين والمتوسط واللي يساعدون وفي منهم يغيرون تفكيرك ونمط حياتك للاحسن وتتحمسين تسوين اشياء مستقبلية , وفي العكس . بس حاولي تثبتين نفسك عندها و وريهم شطارتك وانك قدها , و لا تاخذون على كلام البنات المادة صعبة , الدكتورة الفلانية مو كويسة ابداً , كل وحدة وقدراتها وطريقتها .
اللي حابة تسأل عن شيء معين أنا بالخدمة ..
هذا تقريباً ملخص الحياه الجامعية , حاولت اساعد كل وحدة تفكر وتحاتي كيف الجامعة من كل النواحي الاساسية , وعشان تتهيأ من البداية ولا تتحطم ابداً وتنسى الكسل , ولا تسمعون اي وحدة كسوله وكله تتحلطم ابداً ولا تخلون الكلام يأثر الا لم تجربين من نفسك وتحكمين من ناحية كل شيء . وحتى لا سمح الله تعثرتي بشيء لا تتحطمين الانسان يتعلم ويحاول الحياة كلها تجارب ودروس , ولا اقول انها سهلة ومايحتاج لها اي جهد كل شيء عاملية وسط ويبيلها صبر صبر صبر ..
ان شاء الله أكون ساعدتكم واستفدتوا , وغيرت نظرتكم من اي كلام سلبي وصلكم  
|