مساء الخير
غريبه القسم نايم بالعاده لما اكتب وارجع بنفس اليوم الاقي مدونتي بعيده بالصفحات
بس اليوم نفس الصفحه ..
اخ ياتعديل النوم شـ قد أزمه !
انا عدلته وبنفس اليوم أخترب واليوم بالذات حاطه منبه عساس يقومني الساعه 1 الظهر
بـس من عادتي لما احط لي منبه أقوم قبل المنبه بـ ساعه وهذا ماحدث اليوم
قمت الساعه 12 صليت الظهر ورجعت نمت وإنتبهت 2 الظهر
وهم رديت نمت بس تعرفون النومه اللي تكون يأنبك ضميرك وبتندم بالليل؟
ايييه هذا كنت أحس فيه بسهر بروحي
صحيت 4 العصر وصليت وماشفت احد بالبيت
عبالكم جلست؟
قلت أهلي هم نايمين نومة العصر وانا بسوي زيهم وبنسدح يعني ما بنام !!!!
والمصيييبه ماقمت الا الساعه 6 وربع المغرب وأدور باب الغرفه < من تخريف النوم
اذكر من سنين اختي ايام الثانويه
كانت تحب النوم وبالموت اصلا تداوم المدرسه ودايما اهي اخر وحده تقوم وتخلص
من شدة ماهي متعمقه بالنوم " اهي قامت من السرير بس بين الصاحي والنايم "
وتصقع بالتلفزيون بدل ماتداوم المدرسه داومت بالمستشفى ! وإنشق حاجبها وخيطوه
عاد الاثر للحين موجود بـ جبتها وهاهي الحين متزوجه وعايشه حياتها
ايواان اكمل لكم احداثي
قمت وانا كلي الم واحزان < لا أمزح شدعوه
سويت لي عشا و افكر من الحين وش اسوي عشا دور ثاني بالليل

-
الفتره الأخيره صايره اتابع افلام هنديه
ادمنت بـ صراحه يعجبني الكوميديا والأكشن .
يعجبني لما تلحق البطل عصابه ويصفقهم ويطب من فوق العماره لين الثانيه سبحان الله فلم هندي
ولا اللي يطب فـ البحر بالدباب وفجأة يطلع من البحر بـ جسكي سلامات يالطيب !!!
صراحه الهنود فن و لهم نكهه فـ حياتنا بس مبالغين كثير يعني
وبس والله .