من يفقد أعصابه على ادناة ماجاه.
تأكد ان نفسه حزينة .
لاتسأل الي منغبن عن نواياه.
قدر ظروفه وان زعل لاتلومه.
لاتحرجه ولاتحده على أقصاه .
ولاتجرحه ولاتفرح خصومه.
واضح ولايحتاج فتره وتقرآه .
جالس ونظراته تقول محرومه.
قلبه جريح وخانه الوقت وآعياه.
بتهاجمه؟ اجل تحمل هجومه .
لاتقول وش علمه ولاتتبع اخطاه.
ادخل وسط قلبه وتعرف علومه.
تجيه رايق وانت تجهل خفاياه .
وتشين أخلاقه وتنبش همومه.
ياخوي من صمته تبان المعاناه.
يمكن لو لحاله يشقق هدومه .
هذا يقضي ليلته فالمحاتاه.
يوم انت مديها بسبعين نومه .
اركد ترا التهميش واللامبالاه.
بالشخص كنك بايعه بأي سومه .
تراها مستويه معه جاه من جاه .
شجاع لاكن طايحاتن عزومه .
هذا قبل لوتعرفه ماتعداه.
من طيب راسه من جمايل سلومه.
شوفه زمان المهزله وين وداه.
وداه للوحده وغيب نجومه.
آليا نطق في قلبك تقول عزاه.
ماهو على بعضه ولاهو بيومه.
يضحك دقيقة.. وان ذكر جور دنياه.
يسرح مع أوجاعه برفقة حلومه.
يرجع يفكر في نصيبه وبلواه.
تقول طيرٍ عاد من عقب حومه.
ياصاحبي لاتنشده عن سواياه.
ماضي حزين وبيناتن ارسومه .
ان ماقدرت بوقفتك تمسح أبكاه.
طالبك طلبه لاتتبش علومه.
ارفع ايدينك واترك الأمر لله.
ابيك تدعيله بنفس "ن" رحومه.
ولاجاك ملقوف "ن " يبحث عن خفاياه.
الي على العالم يسدد سهومه
لاتضعفه دام الشجاعه ييمناه.
قله يبي ربك يفرج همومه.