وعليكم السلام ورحمة الله وبركاته ..

نعم أختي العزيزة تقدرين تكملين دراسة الطب بعد حصولك على درجة البكالريوس في واحد من التخصصات الآتية : ( تمريض - علوم " فيزياء .. كيمياء عضوية .. أحياء .. الخ " -علوم طبية تطبيقية - صيدلة ).. وأيضا تقدرين تكملي دراسة التمريض بعد حصولك على درجة البكالريوس في واحد من التخصصات الآتية : ( علوم " فيزياء .. كيمياء عضوية .. أحياء .. الخ " -علوم طبية تطبيقية ).


وجميع كليات الطب في اميركا وكندا وفرنسا فيها مسار خاص في كلية الطب لمن يريد دراسة الطب من حملة البكالريوس في التخصصات السابقة ..


ورحم الله الملك عبدالله بن عبدالعزيز رحمة واسعة .. فهو من وضع حجر الأساس لجامعة الملك سعود بن عبدالعزيز للعلوم الصحية - التابعة للحرس الوطني - فهي الجامعة الوحيدة في المملكة العربية السعودية والتي تتيح الفرصة لدراسة الطب لحملة البكالريوس .


رابط الموقع : http://www.ksau-hs.edu.sa/arabic/adm...pages/bms.aspx


طبعا فيه نقطة أحب أنوه عليها ونسمعها بكثرة وتحتاج الى توضيح ..
الشخص الي بيكمل دراسة الطب بعد البكالريوس ويتخرج رح يكون نفس الطالب الي يتخرج معه في نفس العام والي دخل طب بعد الثانوية العامة .. طبيب عام أو ( ممارس عام GP ) .
مهما كان تخصصك قبل الطب ما رح يغير فيك شئ بعد التخرج .. بمعنى أنك تخصصتي طوارئ وتخرجتي ودرستي طب وتخرجتي .. مارح تكوني طبيبة طوارئ .. أيضا ما راح يساعدك لو حبيتي انك تتخصصي طوارئ في القبول ببرنامج البورد لطب الطوارئ في اي مكان في العالم .. الي يساعد هو المعدل واختبارات القبول أولا وأخيرا والتزكيات من الاستشاريين في سنة الامتياز - طبعا الكلام هذا للأطباء المتخرجين ..


نرجع لموضوعنا .. نعم تقدرين تدرسين طب زي ما تقدرين تكملين دراسات عليا بس في الأول والأخير
لازم تشدين حيلك وتجيبين معدل مرتفع وتحافظين على معدلك الين تتخرجين ..


بالنسبة لطبيعة تخصص (( الخدمات الطبية الطارئة )) وهذا هو المسمى الصحيح للتخصص ..
فإلى حد الآن ماني متأكد اذا كان يقبل في جامعة الملك سعود بن عبدالعزيز وأيضا ما سمعنا انه أحد تخرج من تخصصنا من اي كلية وكمل طب .. أنا نفسي أكمل طب بعد تخرجي ولما سجلت في الكلية وضعت في عين الاعتبار طبيعة التخصص الي لازم ادرسه حتى اني أتخرج واكمل طب .. ذكروا لي في الكلية - الغد - يا اتخصص تمريض او مختبرات او أشعة .. لكن دخلت خدمات طبية طارئة لأنه الأقرب لميولي وايضا لو قدر الله و تخرجت وما انقبلت في الطب ما أكون تخصصت في تخصص أنا ما أبغاه وأعيش طول عمري وأنا كاره نفسي وكاره تخصصي ووظيفتي ..


أدري اني طولت .. بس عموما أسأل الله سبحانه وتعالى لنا التوفيق والنجاح في جميع أمورنا .