نكمّل سوالفنا في المحاضرة 13
instructions to agree : توجيهات للموافقة ..
مع العبارات اللي ذكرناها أمس للموافقه , فيه طرق أخرى بعد نقدر نستخدمها مثل :
1- الإيماء بالرأس أن " نعم " والهمهة : هذي أحنا نستخدمها تلقائيًا , يعني وإنتي تسولفين مع شخص تقدرين تبينين مو افقتك للشخص بهز رأسك أو بالهمهمة ..
2- أستنّي إلى مايجي دورك في الكلام , واستخدمي عبارات تدل على الموافقة مثل : I think you are right أعتقد بأنك محق وكذا ..
3- إبتدي بموافقتك للكلام اللي قاله الشخص , لكن إذا ماكنتي توافقينه كليًا على كلامه إستخدمي عبارات تدل على عدم الموافقة الكاملة , مثل : I agree with you , but أنا أتفق معك لكن .. وتذكرين نقطة الإختلاف أو عدم الإتفاق ( ده الكلام بيفكّرنا بأيه ؟! أيوه الـ partial agreement الموافقة الجزئية ) , أما إذا كنتي متفقة كليًا مع الكلام اللي قاله تستخدمين عبارات توحي بهالشي , مثل : I completely agree with أتفق معك بالكامل وكذا ..

to disagree : لعدم الموافقة أو الرفض ..
هنا يكمّل لنا التوجيهات instructions لكن هالمرة للـ disagree ..
خلونا نشوف شنو يقول :
1- خلّك راكد لاتغضب أو تظهر عدم إحترامك للشخص اللي يتكلّم , بهدوء أشرح له عدم موافقتك لكلامه مع إظهارك لإحترام رأيه , يعني مثلًا كنا في السوق وقلت لك شوفي هذاك الفستان عاجبني حيل , إنتي الفستان مو عاجبك , المفروض شنو ؟! إيوه المفروض إنّك تبيّنين عدم موافقتك لرأيي بهدوء وذوق وإحترام وكذا , تقولين لي مثلًا : أنا أحترم ذوقك لكن موديله قديم .. مو تقولين لي : وين عايشة إنتي في العصر الحجري ؟! هذا الموديل قديم خلاص راحت موضته ..
2- ذاكر لنا عبارات نستخدمها في حال عدم الموافقة وإذا تلاحظين جميعها تبيّن عدم الموافقة + تفتح المجال إنك تبيّنين السبب , مثل : I disagree because أنا لا أتفق لأن ... وتذكرين السبب , شيء مهم جدًا إنا لما نرفض نبيّن السبب " حرّص الدكتور على الكلام ده "
3- نستخدم I'm afraid قبل ماننهي عبارتنا اللي تدل على عدم الموافقة , مثل : I'm afraid I can't agree with you ولما ماتكونين موافقه على ولاشي قاله المتحدّث , تقولين : I'm afraid I completely disagree with you لا أتفق معك بالكامل ..
4- مثل ماقلنا قبل كده , لما ماتوافقين على شي أو ترفضين راي شخص مهم جدًا إنك تبيّنين السبب , مو تعارضين وبس ! شرحي فكرتك ورايك بالكامل .
5- لما ماتتفقين مع شخص حاولي إيجاد حلول , يعني سالفة الفستان اللي موديله قديم الفستان اللي أخترته أنا ما عجبك لأن موديله قديم , وأنا مثلًا عاجبني لأنه لونه جميل هنا مثلًا إنتي تقترحين إنّا ندوّر على فستان موديله جديد لكن بنفس اللون , وهالحل يرضيني ويرضيك ..
وفيه عبارات نستخدمها في هالحاله , مثل : I think we should \ we could لاحظي العبارات فيها could \ should هذا يوحي لك إن الخيارات مفتوحة مو لازم أوافق على رايك , يمكن أنا عندي راي ثاني بعد ..
أما لو استخدمتي must معناتها إنتي تفرضين رايك علي , وهذا يعني إنه بيصير خناق في السوق ..

وبكذا نكون خلّصنا الـ instructions to agree \ disagree ..
أعتذر بشدّة لأني كل الكلام اللي كتبته بالعربي , لكن الكلام كثيييير في هالمحاضرة وصعبة أوي إني أكتبه وكذا , أهم شي مضمون الكلام يوصل ..
سعيدة جدًا بردودكم , إي حلاتكم كذا الماده عليها 3 ساعات لاتطنّشونها ..
وكالعادة أي إستفسار أو توضيح أو تصحيح لايردّكم إلا الكيبورد ..
وأستغفر الله لي ولكم ..