يغنيك عن كثر الحكي مجمل أبيات
و من ياخذ المضمون يلقى الأدله
تدري وش اللي يقتل الحب بسكات
لا صرت في بوحك تحــس بمذله
و تدري وش اللي يكسر الظهر حزات
لا من عطيت إحساس ما هو محله
و تدري متى تستاهل الطعن مرات
لا من أخطيت الدرب وإنته تدله
لا تتبع المقفي على كل حالات
بعض الوجيه اللي تقابلك عله
و لا تسئل الغالي عن الجرح لا فات
نبش الحكي يزود الطين بله
طالع فمن حولك و تاخذ شهادات
ما نلتها لو تدرس الدهر كله
ناسٍ تجر من أسود الضيق ونات
وناسٍ تقضيها وناسه و فله
هذاك شال هموم غيره و لا بات
و هذاك مايدري عن إحساس خله
إحدٍ يهين أصله على كل زلات
وإحدٍ ما تقدر شيمته إنها تذله
لا تقول حظي من عنا الوقت قد مات
قل مااااااات حظ اللي عناه أستحله
و متى ماضاقت الدنيا و على الكيف ما جات
فأطلق أحجاجك ثم توكل على الله