أهلا بك
نصيحتي لك أخوي إنك تقوي علاقتك مع ربك أول شيء حتى تتفتح لك كل الصعوبات
ثاني شيء بخصوص الجامعة أنا صحيح مستجد بس عندي شهادة بالهندسة الكهربائية وعندي خلفية بسيطة يارب تنفعك
1 - مافي شي صعب أبد ( الصعب أحنا نصعبه وأحنا نكبره ) دائما الشيء الصعب يكون صعب بسبب تراكم الأشياء مثلا لو حضرت المحاضرات بيومها وحملت وفهمت كلام الدكتور المادة بتكون شربة مويه بس لو أجلت لو مره وقلت بعدين بأحل أو بعدين بأكمل أو .... الخ صدقني راح تكون بداية للإنحدار للصعوبات
2 - بخصوص انك تشتري كتب لأجل المادة فقط .
لا تشتري لأنك بتخسر نفسك وقت على الفاضي , الدكتور اللي بيشرحه بتلقاه هو موجود بالاختبار مافي شيء خارج المنهج .
بس لو حبيت تقوي علمك وثقافتك وتكون ملم بإدارة الاعمال ايه انصحك تشتري كتب وكثيرة بعد وأنصحك بالكتب الانجليزية لأنها تطور ثقافة الادارة الغربية مع العربية اللي تدرسها
3 - رتب جدول اسبوعي وجرب . كيف يعني ؟
لو مثلا أنت زي موظف راح اعطيك نبذة عن اساسيات الجدول
بعد صلاة العشاء حاول تنام بقدر ما تستطيع لأن النوم بالليل مفيد بالجسم بشكل ما تتصور
الساعه 3 اخر الليل عدل جوالك وقوم صلي لك ركعتين لوجه الله بعدها افتح بلاك بورد شوف ايش محاضراتك وواجباتك وأبدأ حل وحمل لين الساعه 5:30 الفجر
رزح صلي بالمسجد وحافظ على صلاتك بوقتها والصف الأول الله الله
بعدها ارجع البيت البس واذا عندك اخوات واخوان وديهم مدارس وبعدين روح العمل
ترجع العصر البيت اول ما ترجع البس ملابس سبورت وروح خذلك لفه على الحارة مشي قرابة 45 دقيقة
الرياضة تجدد لجسمك النشاط وتولد لك طاقة .
المغرب خذ لك شور وروح صل وارجع وخلك عند رجول أمك شوف وش تبي وش ناقصها وتعشى معها بعدين صل العشاء وروح نام
هذا الجدول لو تطبقه حياتك تكون كويسه ان شاء الله
4 - لا توهم نفسك أن الدكتور ما يعرف يشرح او صعب المقرر معاه , دائماً أقنع ضميرك إن اللي قدامك قاعد يؤدي عمله وأنت عليك الاستماع له وحاول تلخص المحاضرة بدفتر خاص للمادة , وكل مادة خل لها دفتر خاص ملخصات معلومات تعاريف اكتبها بيدك عشان تحفظ وتعود نفسك على الفهم
أتمنى لك دراسة جميله وحلوة يا حلو . .