ياما نهار أمس القريب بكيتك
يا ما ذبحت من الوله في تحريك
باعتني الدنيا و جيت و شريتك
واليوم يمكن ما أحبك ولا ابيك
أضمى غرام ولا لقيتك رويتك
سبحان ربي في ضلوعي معليك
ياما و ياما من حناني عطيتك
أزعل عليك شوي وارجع وراضيك
واطاولك مابين علك و ليتك
وليا مرضت اقول فيني ولا فيك
من كثر ماحبك أحب أهل بيتك
حتى الحديقه والغرف والشبابيك
وأحب ديكورك وفرشة موكيتك
وكل المرآيا والتحف والسراميك
وكل الدروب اللي خذتني وجيتك
وكل الأمور اللي في بيتك تسليك
شالك و مكياجك و حتى جكيتك
حتى حلقك اللي تحطه فأذانيك
خواطرك شعرك فنون أتيكيتك
صح الله السانك وتسلم أياديك
رسمت لي موتي ومت ورثيتك
وأبعدتني عن بند ربعك وأهاليك
جلست أدور فالضلوع و لقيتك
ذكرى مثل ذكرى عصور المماليك
لو كنت جرحي ياغرامي بريتك
مير البلا والجرح في فقد غاليك
يا حزن تكفى لا تطول فديتك
لايجتمع ليل الغرام و لياليك
ياما بديتك وأنتهيت و بكيتك
والحين بصبر وابكي الحزن وأبكيك