ومرت سنة
**
ومرت سنة
ولا على بالك تمر
لحظة ولو حتى خطا
الله ياكبر البطا
واللي بعد هجرك سطا
شوق وأنين
وذكرى بقت في وحدتي
تعزف حنين
الله يا كبر السنين
الله يا كبر السنين
***
ومرت سنة
خذت من ايامي عمر
واهديتها نبضي زهر
واللي ظهر
شوك وسهر
وضميتها حد القهر
واخفيتها عنك عمر
ومر العمر ما شفتها...؟
ومر العمر ما شفتها ...؟
***
ومرت سنة
والهم بالحبر انهرق
واللي بقالي من ورق
دمع وأرق
واحساس في صوتي شرق
والليل من عيني سرق
حزنٍ على خدي طرق
بابك وصدرك ما رفق
يا شين حزنك لا صدق
يا شين حزنك لا صدق
***
ومرت سنة
ولا على بالك أمر
وانا بدربك انتظر
وفي صدري احساسي يقول:
وش تنتظر لا تنتظر
هذي السنة
مرت ولا جابك خبر
ارحل ودور لك عمر
ارحل ودور لك عمر
** ياسر العتيق **