|
ما قدّر الصبْر انتظاري وانا الشـوق يْحديني..عمر المدن ما حرّك احساسها صمت الصحاري!!
بال الزمان اطول من اقصى حدود الصبر فيني
ثلثين عمري صبر ما جاب لأغلى الناس طاري
..^^^^..
كان انتظاري لا عطش يرتوي من دمع عيني
والحين مامن دمع يروي عطش طول انتظاري
..^^^^..
ذاب الفـرج من حرّ شوقي وصار اللي يمـيني
جمر الندم , والخوف من مقبل أيامي يساري
..^^^^..
حطّ الحزن رجله على الدرب واشوفه يجيني
ويشّر على صدري بيدْه ويقــول : الدار داري
..^^^^..
توّي عرفت من المقـادير انا بالضبط ويني !!
مكتوب في صفحة ( ردى الحظ ) والأيام قاري
..^^^^..
أثْر اللي راح من العمر حـال ما بينه وبيني ؟
يعني بليل اعوامي اللي مضت لليأس ساري ؟
..^^^^..
خـلاص ما عادت هناك أمنـياتٍ تحتـريني
عزمي جثا كنّي غدرته بـ لحظات انكـساري
..^^^^..
لو فكّـر الضـيق إنّه يمـرّني أو يحتـويني
بأعتبره ان ما ضاق لا خش بالجوف انتحاري
..^^^^..
في داخلي شعب من الآهـات يستطعم ونيني
وانا انعـم بتعـذيبه ان شبّ بالخفّـاق ناري
..^^^^..
الشعر هبّ وطاحت اوراق من شجْـرة سنيني
على ارض نفسي لين صار اغلب الاغصان عاري
..^^^^..
وآخـذ من الاوراق ما تجـمعه كلـتا يديني
وادفـنْه للذكـرى قبل ما تبعّــدْه الذواري
..^^^^..
وأمـرّ في شعري خيالٍ شكى قسـوة يقيني
وانظم من ابياته سهـر ليلي وحيرة نهـاري
..^^^^..
لذا فهو حالة ( جنون بعـقل ) من تعـتريني
تظهر على وجهي نتيجة عصر فكري مـواري
..^^^^..
شعـر يتغـلغل في قلوب الأوادم ويْحكـيني
على الزمان ويجْـبره يعترف لي بإنتصاري
..^^^^..
يمكن خسرت انسـان سبّة زمن ما يشتهيني
لكن كسبت المعـرفه يوم ضيّعـني قـراري
..^^^^..
ما قدّر الصبْر انتظاري واناالشـوق يْحديني
عمر المدن ما حرّك احساسها صمت الصحاري
...
..
.
دمتم بــــــود
نــــــــــــــاصرالنــــــــــاصر
|