دخــــــــــــــــــيـــــل أحــــــــــــــــــــــــلا عــــــيـــــــــون ....
طفح كيل القصيد اللي نزفته وابتدا الموال
............... وانا لازلت ادور لك كلام يستر اوراقي
ادور في مجاهيم القصايد مايثير البال
............... عساني لاوصفت اوصف حلاك وأكسر وثاقي
انا لا شفت هالكحل بطرف عينك ازيد هبال
............... وازيد من الجنون اكثر جنون وانثر اشواقي
دخيلك لا تناظرني ترى بعض العيون خبال
............... دخيلك لا تزيد الطين بله وانت في اعماقي
دخيل اجمل عيون اللي شقاوتها تهد جبال
............... دخيلك لاتجنني بها ثم تنوي فراقي
دخيل احلا عيون اللي بها سحر وشموخ رجال
............... تخليني معاها ارحل بعيد وتوسع افاقي
دخيل اجمل جديل طاح من عالي مثل شلال
............... على خصر نحيل فوق صدر كمل الباقي
دخيلك والهوى لا من تحرك ثم جديلك مال
............... يميل القد مع ميل الجديل ومعه خفاقي
دخيل اجمل حرير اسود سواده فاق سواد شال
............... تخليني على زندك انام واغمض احداقي
دخيل الجيد والعاتق دخيل النحر والسلسال
............... دخيل الشفتين اللي تضيع هقوة الهاقي
دخيل الخال في صدرك دخيل اجمل صدر به خال
............... دخيل الضمتين ورجفة الخفاق وعناقي
دخيل السلسبيل اللي بصدرك والعرق لا سال
............... تخليني وسطه اغرق الين اوصل لترياقي
وانا لاقلت بغرق بك ابغرق ماعليها جدال
............... ابغرق لين يذبحني ضماك ويطفش الساقي
دخيلك يوم انا جيتك وجيت بشيطنة اطفال
............... تخليني على الفــطره كذا لاتــنــوي اغراقي