في شغله هامة بما إنكم مستجدات شتسوون ؟
الجامعة تطلع بطاقة تسمى بطاقة الأمن
هم بطاقتين ..
بطاقة مافيها صورتك القسم الرجال
بطاقة فيها صورتك تكون للقسم النساء
*شنو يلزمني اذا بطلع لي البطاقة ؟
استخراج البطاقة مجان
تقدرين من أول سبوع تصورين صورتين تقريبا مقاس 4 / 6
وصورةمن كرت العائلة .. وصورتين من الجدول وتسلمينهم للقسم النساء الأمن
راح يعطونك ورقة محدد فيها تاريخ اليوم الي راح يسلمونك فيه البطاقة
وين يصير مكتب الأمن ؟؟
مكتب الأمن اول ماتطلعين من بوابة السيارات الخاصة للجامعة على يسارك مكتبهم على طول
بطاقة الصراف
انتي اذا قدمتي على البطاقة للأمن هم بعد فترة يحطون اعلانات في الجامعة انا كل طالبة
تستلم بطاقتها وتروحين تفعلينها في بنك الرياض وبعد التفعيل بكل بساطة اسحبي مكافأتك
وعليك بالعافية 
*طيب شسوي بالورقة إلي يسلموني وياها ؟؟
تحافظين عليها وكل يوم تجين فيها الجامعة قبل ما تفكرين تحطين كتاب المحاضرات
تحطين الورقة وتحرصين يا حلوه إنها ما تضيع 
* طيب ليه كل التعب هذا على ورقة ؟ 
السبب الأول : إذا ضاعت تدفعين غرامة 50ريال
والسبب الثاني وهو الأهم : هالورقة " بطاقة الأمن بدون صورتك الشخصية " مهمة في خروجك من
الجامعة هذي القسم الرجال اذا بتطلعين آمن الجامعة يطلبها من السواق وبعدها يرجعها وكل يوم على هالحال 
السبب الثالث : ما تمشي معاملاتك إلا بطاقة الأمن
السبب الرابع : بعض الأحيان حتى كفتيريا الغداء يطلبونها منك اذا انتي تدرسين بالجامعة او جاية كذا >>> نادر يطلبونها
وحتى اذا ماكانت عندك ما راح يقولون لك لا تتغدين بس تكون عندك عن عوار الراس
السبب الخامس: إذا تستأجرين صندوق بالبطاقة
السبب السادس: البطاقة الي فيها صورتك الشخصية القسم النساء في الاختبار النهائي ما تدخلين بدونها
شنو يضمن انك جايبة أختك تختبر بدالك علشان كذا تجبينها يطابقون انتي الي بصورة ولا غيرك 
*إذا نسيتها شيصير؟
بكل بساطة ينزلونك من الباص من غير مطرود 
************************************************** **************
الحين خلصنا الأسبوع الأول بسلام
بدينا في المذاكرة و أول محاضرة
*أول يوم في الدراسة مهم ولا لا؟
أول يوم مهم كثير فيه تتعرفين على الدكتورة و أسلوبها
طبعا أول يوم راح تعطيكم الدكتور / الدكتورة رقم تحويلة ضروري تكتبينة وساعات المكتبية >>> ليه ؟؟
أولا شنو المقصود من الساعات المكتبية ؟
الساعات المكتبية يعني الوقت الي يكون فيه الدكتور فاضي ويقدر يستقبل استفسارات الطالبات
في بعض الأحيان يصيبك ظرف تكلمين الدكتور وتقولين له انك ما تقدرين تحضرين المحاضرة
وتقولين له الظرف يحضرك بدل ما يعتبرك غياب
في الاختبارات إذا عندك سؤال تقدرين ترجعين له بدل كل بنت تعطيك إجابات من راسها 
في أول يوم بعد تتفاهمون مع الدكتور على درجة اختبار الشهري والنهائي " توزيع الدرجات "
اسم الكتاب إلي راح تدرسونه
************************************************** ***********
* كتب الجامعة كيف أسعارها ؟؟ وهل اشتريها ؟
الكتب رخيصة عادة ماتتجاوز 60 الا ماندر
بستثناء كتب التخصصات الصحية 
وبعض الأحيان يقولك الدكتور لا تشترين بس يكتفي بلي تكتبينه معاه
او بعض الأحيان ينزل ملزمة في المكتبة
بس أنتي شتسوين بما انك سنة أولى يعني مواد عامة تاخذين الكتب
من أي بنت تعرفينها كانت تدرس بالجامعة
عادة بنات الجامعة مايشترون كل دفعة تعطي الدفعة إلي تلحقها يعني وراثة
وفي النهاية تطلع في الجامعة 
مبنى 28 بوجهك على طول أول ما تدخلين أنتي تروحينها مو ابوك ولا اخوك
وبالنسبة لكلية الأداب
بعض الدكاترة تنزل الملزمات في مكتبة الأبرار في الجامعة
يعني اذا ماعندك احد في الجامعة الله يعينك على الروحة للجامعة
************************************************** **************
*الغياب في الجامعة؟
لا تغيبين إلا الظرف طارئ لأن حضورك للمحاضرة يسهل عليك وقت تذاكرين للاختبارات
عادة الدكاترة يعطونكم خبر أول يوم دراسة عن الغياب وأسلوب كل دكتور
المهم الغياب بدون عذر ما يتجاوز 3 غيابات إذا تجاوز الغياب 2مصيبه >>>ليه ؟
لأن ينزل لك حرمان من الأختبار
************************************************** **************
* شنو المقصود بالحرمان ؟
يعني إذا غبتي 3 مرات بدون عذر ينزل لك حرمان ممنوع دخولك للأختبار
الحرمان مصيبة يخسف ابو المعدل يخليه يطب على وجها
************************************************** ****************
المذاكرة كيف ؟
احرصي انك تذاكرين أول بأول لا يتراكم عليك
الدكاترة مايجيبون أشياء خيالية والأغلب ما يطلعون من الكتاب
في بعض البنات الله يهديهم ما يفتحون الكتاب إلا في ليلة الاختبار و تجي وتقول الأسئلة صعبة
يا عمري ماينفع هذا الكلام لازم تذاكرين أول بأول
الدكتور يسأل في المحاضرة السابقة ؟
بالنسبة لسؤال في المحاضرة السابقة يعتمد على الدكتورة
يعني انا جربت دكتور يسأل طبعا انا ستانست 
احب مثل كذا في الأختبارات ولا اسهل
في واجبات ؟
نادر نادر يقولون لك واجب
ولا حتى في تصحيح واجب عندهم كتبتي المحاضرة ولا بعمرك
راحت ايام الطيبين >>> تقصد المدرسة 
وعلى النشاطات يطلبون بحوث تقريبا كل دكتور يطلب بحث تسويه عن المادة الي يعطيك وياها
************************************************** ********
يـــتــبــع