أبوقوطي:مرحبا مليون ،ياسعد منهو سمع هالصوت.
ماجد:يسعد أيامك.
أبوقوطي:وش حالكم وحال الأخوان؟
ماجد:يزقحون،إلا يا أبو قوطي داق عليك أبي منك خدمه صغيره.
أبو قوطي: تأمر أمر يا أبو سراديب.
ماجد:تكفى يا أبو قوطي الفزعه،،أبي من عندك كم ضب.
أبو قوطي:أصير لك ضب يالغالي.
ماجد: لا الله يسلمك لاتصير أنا بستأجرهم يوم وثمن أرجعهم لك.
أبو قوطي:كم واحد تبي؟
ماجد وقد أبعد الجوال عنه:ياعيال كم عدد البنات بسرعه.
طلال راعي القز:9 بالتمام والطول والعرض.
ماجد:يا أبو قوطي نبغى 9 ضبان.
أبو قوطي:أبشر،لكن بغيت اسألك فيه مواصفات معينه للضبآن.
(هههههه إدعس حتى للضبآن موديلات ومواصفات)
ماجد :نبي آخر موديل،ضب حجم عائلي،دفع رباعي،وقوي شخصيه واثق من نفسه،وأهم شي عكرة الضب لاتقل عن متر.
(الشباب فطسوا ضحك)
أبو قوطي:حنا أهم شي راحة الزبائن،،متى تبي موعد التسليم.
ماجد:الليله برسل لك واحد من الشباب يجيبهم لك.
أبو قوطي:على بركة الله.
(صك ماجد المكالمه وهو مبسوط ويحس بالإنتصار)
سلطان وبحماس:ههههه البنات لا شافوا صرصور إستلجوا وقعدوا يومين في حاله هستيريه وش لون ضب وواثق من نفسه هههه.
أنس:ههههه قويه ياماجد ضب وواثق بيسدحهن كلهن ههههه.
ماجد:ههه لا لو تدرون وين بحطهم.
أبراهيم:وين ياكافي!؟
ماجد وبنذاله:بحطهم على فرش هالسلق تحت البطانيات.
سالم تسدح ضحك: هههه هذه المقالب.
(سالم يضحك على كل شي يابرودة دمه)
طلال :المصيبه وش لون ندخل غرفةالبنات؟
ماجد وبعد تفكير:بالعادة البنات كم الساعه ينامون؟
طلال نط بالجواب:على خبري بعد صلاة الفجر على طول.
يوسف:وإنت أعوذ بالله كل شي عنهم تعرفه.
ماجد وبسرعه:إسمعو بعد الصلاة نحاول نطلع البنات للصاله.
أنس:يوه صعبه هذولا ماينلعب عليهن.
سلطان:إيه والله إنهن عفاريت.
ماجد وبتحدي: إذا هن عفاريت أنا الجني الأزرق وبوريكم وش أسوي.
إبراهيم:قدام سر ونحن من وراك ندمر.
(دايم العيال مع الخيل ياشقرا يفزعون ومايدرون وش الطبخه)
ماجد:شباب بعد الصلاة تروح يا أنس تقول لخاله رقيه إن الكهرب لازم نطفيه عشر دقايق،،وإن كل اللي بالبيت لازم يتجمعون بالصاله،،إذا سألت خاله رقيه وش هو له نطفي الكهرب،،قول لها المكيف تعطل وبنصلح الفيريون.
إبراهيم وبضحكه عاليه:عليك تفكير زحفيشن.
دهام:أحسن يستاهلن هاللي مايستحن وألا أحد يتجرأ يسوي مقلب كذا.
ماجد:تكفون ياشباب خلونا نسوي الحركه بسرعه عشان محد يشك.
(فعلا كما أراد الشباب تحقق مبتغاهم،،فبعد صلاة الفجر،،إجتمعوا البنات في الصآله ونقعناهم بالحر ربع ساعه عشان بسرعه يتعبون،،منصور وأنس وطلال ويوسف قعدوا مع خالاتي والبنات بالصاله إحتياطا عن الشك ،،أما ماجد والباقي إتجهوا لغرفةالبنات)
<في غرفة البنات<
دهام وقد أخرج الضبان:الله ياكبر ذا الضب ،آخ لو بس أعرف فراش سعدى وينه كان حطيته في وسط مخدتها.
ماجد:بسرعه موب لازم لكن أهم شي نزل على كل فراش ضب وغطه بالبطانيه.
(حط الشباب الضبان على فرش البنات،،وراحوا للصاله عشان ينضمون للبقيه،،بإشاره من ماجد راح إبراهيم شغل طبلون الكهرب)
سلطان:خلاص ياخاله تطمنوا كل شي تمام.
خاله رقيه:الله يجزاكم خير ماتقصرون.
إبراهيم كاتم الضحكه:لابغيتو شي حنا بالمجلس أول ماتصارخون حنا بالنجده .
(الشباب يناظرون لبعض بنذاله ويضحكون)
<سديم وقد همست للبنات<
سديم:بنات والله قلبي ناغزني وراهم بلاء.
سعدى:وش بيسوون أعلى مافي رؤوسهم يركبونه.
معالي:بالطقاق.
سديم:إمشوا بس خلونا ننام.
سعدى:موب كثري.
(دخل قروب البنات للغرفه وصكن الباب،،كل وحده إتجهت لمكان،،اللي راحت للتسريحه واللي تلبس بجامتها واللي على اللاب)
سديم وبتوجس:بنات أحس فيه شي بالفرش يتحرك،،كل وحده تناظر لفراشها.
(فتحوا البنات البطانيات بدءالصراخ اللي فجر الدنيا،،أسماء أغمى عليهاوباقي البنات اللي تصيح واللي تصارخ،،أمامعالي طلعت لاشعوريا بدون غطاء تركض والصراخ إرتفع لدرجة إن كل اللي بالبيت تجمعوا،، الشباب من باب الشهامه ومسوين فيها حبتين قدام خالاتهم)
سلطان وبنخوة:وخري ياخاله حنا لها.
<أكيد لها موب إنتم راعين المصيبه<
ماجد وبنذاله:يابنات الموضوع مايستاهل ترى للحين ما شفتوا شي.
(البنات في حالة صراخ وإنهيار،،هذه ضبان ماهي لعب،،لا وبعد ضبان من العيار الثقيل فل أبشن كامل المواصفات)
كادي وهي تصيح:يمممماه وووع أنقذوني هيلب مي بموت.
طلال وفيه ضحكه: نو واي ياجعل العدو يموت إنشاءالله.
(الشباب قاموا يلاحقون الضبان بالغرفه وعمدا يلاحقونها بإتجاه البنات،،وبعد مرور ربع ساعه من المطارد البارد،،تم القضاء والقبض على جميع الضبان وطلعوا الشباب وهم فاطسين ضحك،،ماجد قبل لا يطلع نزل ورقه كبيره على التسريحه وطلع،،أما البنات بعد هذا الحادث المريع،،كل وحده قامت تهدئي من روع الثانيه،،وبعد مامر على الموقف ساعه،،إنتبهت أروى للورقه اللى على التسريحه،،تجمعوا البنات وإنصدموا باللي كان مكتوب...
<<مراحب..
من ماجد صاحب القلب الجامد،،زعيم الهجوم،،إلى عربجية البنات سعدوووه،،
نيابة عن شلتي الشباب الفالحين،،فإننا نعلن الحرب من هذه الساعه،،وماهذا المقلب إلا كهدية رمزيه إعلانا لحالة الإستنفار،،فنرجو منكن الحذر الشديد تحسبا لأي قصف ،،
وشكرن من صمامات قلوبنا المسدوده التي فجرها الصراخ،،شكرن مره أخرى على صراخكن الشجي الذي أطرب مسامعنا،،،
هههههههههههههههه
تحياتي<<ماجد.)
أروى بإنفعال:حقير النذل.
سديم وبعصبيه:الكلاب طلع منهم المقلب.
بشرى:يممماه وش هالمستوى المقرف اللي نزلوا له.
معالي:الله يأخذهم ياثقل دم العيال وألا هذا شي يمزح الواحد فيه.
(الله وأكبر يعني إنتن اللي ماسويتن مصيبه على الشيشه والعود)