<<الفصل الثامن.>>
مر أربع أيام على المقلب اللي سويناه بالشباب،، وحنا قاعدين على أعصابنا،،ياترى وش ناوين عليه جديد،،خفنا منهم وما سكتوا إلا وراهم بلاء.
سديم وهي منسدحه على الكنب:يوه يابنات أبي أطلع زهقت.
كادي وبضحكه:هذا وجهي إن طلعونا عقب مقلبنا.
<معالي طول الوقت سرحانه وموب حول أحد>
فوزيه:وش رأيكم نطلع للسوق اليوم؟
سعدى وهي ماسكه جوالها:بنات حصوه تسلم عليكم.
البنات:الله يسلمها.
هبوب:حمده وجع تمصع شرايين العدو أنا قلت أبي أغاني أم فيصل موب موضي.
حمده:الطق هو الطق أهم شي تقومين تنافضين وتهزين قضينا.
بشرى:إلا كم باقي على عرس خلود؟
هبوب:بعد 3 أيام.
بشرى:يمديني أعدل بفستاني.
(فجأه ومن غير سابق إنذار قامت معالي تشاهق وتصيح،،كلنا خفنا وتجمعنا عليها وحاولنا نفهم وش السالفه لكنها قعدت تصيح بقوة،، أنا من شفتها ماسكه جوالها قلت أكيد جاها خبر يخرع،،سحبت جوالها وكانت فاتحه على رساله مكتوب فيها:
<<معالي ماعاد فيني أتحمل أكثر من كذا،، صبرت وتعبت نفسيا،،موب قادر أنام ولا قادر أعيش إنسان طبيعي،،أحبك يامعالي،وكان إنك قبلتي حبي فأنا أسعد إنسان على وجه الأرض ،،وإن كان في بالك أحد ثاني الله يهنيك لكن والله لا أحرم الزواج عقبك ،،
أحبك يامعالي،،
أحبك يامعالي،،
<<<سلطان>>
سعدى وبإندهاش:إخس ياسلطانوه وتعرف تحب بعد.
<سديم سحبت الجوال وقعدت تقرا هي والبنات وطاحوا من الضحك.
هبوب:مالت عليك وكل هالصياح علشان سلطان.
معالي ومازالت الدموع تناقز من عيونها:ياربييييه إنصدمت.
كادي:لا قولي إنك تحبينه إنتي ووجهك والله إني شاكه في وضعك من أول.
أسماء:إيه صادقه بس سرحانه وأخلاقها قافله وموب حولنا أبد.
سعدى وبكل برود أعصاب:معالي تبغيني أوقفه عند حده وأمسح في وجهه طبلون السياره.
معالي وبصرخه: يا ويلك يا سعدى أنا ماتصدقت يحكي ويتكلم.
سديم وبضحكه:ههههه البنت رايحه فيها.
فوزيه:هههه ياحليلك ياسلطان.
سعدى:لا عاد صراحه كل شي توقعته إلا إني أحضر فيلم هندي عرض مباشر.
أروى بإندفاع:وش راح تردين؟
معالي وبتردد:مدري محتاره.
سعدى:إسحبي عليه سيفون،، إذا هو شاريك صح يعرف وين يلقاك.
معالي:على الأقل لو يعرف شعوري إتجاهه.
هبوب وهي تحاول إحراج معالي:الأخت وش هو شعورها.
معالي إنحرجت وماردت
كادي:لا بالله إن البنت دخلت عالم الحب من أوسع أبوابه.
معالي:بنات تكفون وش لون أرد بس بطريقه غير مباشره.
سعدى:أقول وخروني عن هالسوالف لا أنكبكم وأجيب فيكم العيد،،ترى ماعندي ماعند جدتي عيده.
سديم: ردي عليه بمسج.
معالي:مستحيل لو تنطبق السماء على الأرض.
كادي:عادي ياغبيه.
سعدى:ههههه لا من جد أول مره أحس نفسي مفهيه بالسوالف.
سديم:لا إنتي خليك حق هواش ومقالب ماتنفعين للرومانسيه.
هبوب:اممم لقيتها،، يوسف أخوي صديق سلطان الروح بالروح وأحاول ألمح له إنك مهتمه بسلطان.
معالي وبعد تفكير:إيه كذا أحسن.
سعدى فاقعه ضحك:آخر وحده توقعتها معالي،،أجل أنا أكيد يبي يصير لي مستقبل باهر دام إن معالي طاحت بالحب هههه.
<معالي وجهها صار أحمر>
سديم:سعدى إنطمي حرام عليك أحرجتيها.
هبوب:بنات ألا أقول وش رأيكم بس نروح للسوق نجهز لعرس خلود؟
أسماء وبدلع:إيه تكفون أبغى مناكير فاقع لونها ماعندي.
معالي وبعفويه:أمانه خلو سلطان هو اللي يودينا.
البنات.:هههههه
سديم:أنا خاطري ماجد.
سعدى نقزت على سديم: وووع مالت على وجهتس.
سديم وبضحكه:هو صحيح نذل بس والله قلبه طيب.
هبوب وبتعجب: لا صاير بالدنيا شي،،أحد يمدح ماجد.
معالي:هبوب تكفين قولي ليوسف يخلي سلطان هو اللي يودينا.
هبوب:لا معصي أنا أبي يا منصور يا سالم أحسهم سنعين.
كادي:ههههه مالقيتي إلا سالم هالفاصل.
سعدى:ورى ما تسكتون خلاص ،،هبوب قولي لأخوك يجيب سلطان وقضينا.
هبوب:طيب.
(بعد صلاة المغرب طلعنا للحوش ننتظر يوسف وسلطان،، شوي وطلع سلطان يا إن معالي إختبصت وقعدنا نضحك عليها هالهبلا،، ركبنا السياره وهذه أول مره بالنسبه لي أشوف فيها يوسف وسلطان عن قرب،، سلطان عاقل لكن إنه مربوش وفيه شوية طفاقه،،سوالفه ممتعه وتدخلين معاه على طول بالجو،،على العكس تماما يوسف،،هالإنسان قمةالهدؤ،،الغموض،،الصمت،،تجميعه غريبه ،،أحس إنه ثقيل دم مدري ليش واللي يقهرني فيه لابغى يتكلم لازم يناظر لعيون الواحد ثمن يهرج،،مايعرف يتكلم عن بعد،،وحنا راكبين جاء منصور وماجد وقفوا عند دريشة السياره)
سعدى وبصوت مسموع:ياليل البعارين وش يبون بعد.
سلطان وبضحكه عاليه:يا سعدى الله يفكنا من شرك إنتي وماجد.
<قاموا البنات يضحكون>
ماجد:هيه وين رايحين؟
يوسف بهدؤ: وين يعني للسوق.
ماجد:إنتم مجانين تأخذون هالقرود معكم والله لا يستفردن فيكم.
سعدى طنقرت بسرعه.>
سعدى:أقول لا يكثر عاد موب من زين هالحلايا نستفرد فيهم.
ماجد ويخز في سعدى: وش رأيك ياسعدى أنا أوديك للسوق.
<ياويل قلبي هذولا إذا إجتمعوا قنابل>
سعدى:ياماجد حلم إبليس بالجنه.
ماجد:طبعا إنتي إبليس.
<سعدى طلعت من طورها والبنات فاطسين ضحك عليهم>
سعدى:ماجد ورى ما تعطينا عرض أكتافك وتخلينا نمشي.
ماجد بإستهبال: عرض وألا طول ههههه.
سعدى:وه ياسخفك سخفاه.
منصور ويتصنع الذرابه: سعدى هالمره سامحيه.
<سعدى بداخل نفسها،،والله يامنصوروه علشان حصه موب راده عليك وألا كان مسحت في وجهك هالناعم الشارع>
سلطان:خلاص شباب وخروا نبي نحرك.
ماجد:يعني إنتن متحمسات للعرس؟
بشرى:إيه.
ماجد:اها.
<يوسف صك الشباك وحرك>
مشينا وطول الطريق محد قادر يتكلم،،سلطان ميت من الإحراج،،وصلنا السوق ونزلنا ويوسف وسلطان قعدوا بالكوفي شوب يحتروننا)
<<<<< بالسوق>>>>
سديم:أنا أعرف محل روعه.
كادي: لايكون ذاك اللي لوعتي كبودنا فيه كل مره ساحبتنا لمه.
أسماء:أبي محل إكسسوارات مالي شغل.
هبوب:تكفون خلونا نروح حق الشنط.
سعدى بسرعه تنرفزت: بنات ما ينفع كذا خلونا نتقسم.
<من عذرها لوعصبت ماشاءالله 9 بنات وكل وحده تبغى لها مكان>
سديم:لا لا ما ينفع نتقسم عشان سلطان ويوسف يلعنون خيرنا.
سعدى:مالهم دخل فينا.
هبوب:لا لا تكفين ماعرفتي يوسف.
حمده:بنات تعالوا شوفوا ذاك المحل بروح له تعالوا معي.
<داخل المحل>
حمده:وش رأيكم بهذا الفستان؟
بشرى:لا وع موب حلو دفش.
كادي:حمده شوفي الأحمر أحلى عليك.
حمده:لا مره وسيع أبي واحد ضيق عشان الرقص.
صاحب المحل قاط إذنه: وش رأيك في هذا يجنن عليك.
حمده وبإبتسامه:صدق.
صاحب المحل: لا وبتطلعين أحلى وحده.
سعدى تناظر البنات:هذا وش يحس فيه والدلخ حمده مصدقه كلامه.
صاحب المحل:يا آنسه وش رأيك بالتركواز مقاسك بالضبط.
حمده وببلاهه:صدق.
سعدى خاشه عرض:هيه خير يا أبو الشباب عسى ما شر وين قاعدين.
صاحب المحل يحاول يقط الميانه:قاعدين بمحلي هههه.
سعدى:أقول على تبن ولا يكثر أحسن بعد أعطها مقاس ملابسها الداخليه والكلوت.
سديم:سعدى يرحم أمك فضحتينا.
سعدى:لا ما فضحتكم وش قلة الحياء هذا وحنا لابسين عبايات قزنا قز اللي مايستحي،، بعدين إنت وش دراك إنها بتطلع حلوه وألا بيطلع مقاسها!
صاحب المحل: لا بس مجرد توقعات.
<سعدى خذت الفستان من حمده ورمته في وجه صاحب المحل>
سعدى:إبلع لسانك وتوقعاتك إحتفظ فيها لنفسك محد طلب رأيك،،بنات خلونا نطلع ما ناقص إلا يلبسنا هدومنا بعد.
<يالبيييه يا سعدى بنت رجال عز الله إنها شقرديه>>
البنات طلعوا وهم متضايقين.
حمده:سعدى حرام عليك طيرتي الفستان علي.
سعدى:وإنتي موب حرام عليك تسمعين هرجه وتسكتين،،ناوي يقط الميانه هو وجهه.
سديم:خلاص إسكتو خلونا نروح محل ثاني أوف.
<هذه حالتنا من مكان لمكان وتقريبا خلصنا نص أغراضنا>
سديم:بنات أحس فيه إثنين يلاحقوننا من الصبح.
سعدى:إمشوا و ياويل اللي تلتفت ورى موب أزين لها.
أسماء:بنات تكفون خلونا ندق على سلطان ويوسف والله إني خايفه.
سعدى:خير إنشاءالله تدقين عليهم،،ليش حنا موب عاجبينك كأننا جيش.
هبوب بخوف:سعدى والله لو يوسف وسلطان شافوهم والله لا يقلبونها مجزره.
<سعدى دارت ظهرها تبي تتهاوش معاهم،،إلا أختفوا فجأه ماتدري وين طسوا ،،آثري سلطان ويوسف مقبلين وهم معصبين لأنهم كانوا قاعدين بالكوفي شوب اللي فوق ويشوفون الجاي والرايح تحت>
سلطان بنرفزه:بسرعه وش هرجوا معاكن؟
كادي:والله يا سلطان ما قالوا شي.
أروى:أصلا ما إنتبهنا إنهم ورانا.
يوسف:يعني تقنعيني إنهم يلاحقونكم بسلام.
سعدى:موب لازم تقتنع.
<يوسف ما إستوعب رد سعدى،، والبنات يدقون سعدى ويهمسون لها إنها تسكت وماترد>
سلطان بنرفزه:خلصتن شغلكن!
حمده:تكفى الله يخليك باقي كم شغله.
يوسف:أجل أمشو قدامنا.
سديم:طيب.
سعدى:لا موب طيب،، سوري ما أعرف أمشي وأنا وراي واحد فوق رأسي.
سلطان:سعدى بلا عناد وخلي اليوم يعدي على خير.
سعدى وبعناد:يا أخي تبي تمشون إمشوا موب رايحه معكم.
<البنات يحاولون يهجدون سعدى بس ما رضت>
يوسف أول مره يصرخ بصوت عالي: سعدى لا تخليني أضطر أمد يدي عليك.
سعدى وبتعجب:لو فيك الخير يا يوسف تعال مد يدك .
يوسف بإنفعال:سعدى لا تصيرين عنيده وإمشي بكرامتك.
سعدى:وإذا قلت لك موب ماشيه.
يوسف يناظر لسلطان: سلطان خذ البنات وإسبقونا أنا بتفاهم معها.
<يوم قال كذا أحس الدنيا لفت فيني،، وش يبي ينشب لي،،البنات كلهم راحوا وبقينا لحالنا،،توقعت إنه بيصارخ علي ويستفرد فيني ويقوم الدنيا فوق رأسي ويقعدها،،لكن الغريب إنه ماتكلم ولاكلمة،،وقف جنبي وسكت وقام يناظرالجاي والرايح،،إستمر الصمت عشر دقايق،،توترت من سكوته وكان ودي أتهاوش معاه>
سعدى وبنرفز:وراك ناشب لي هنيا؟!
يوسف بهدؤ يناظر لسعدى:أحتريك إلين مايطيح اللي برأسك.
سعدى:ممكن تخليني وتروح.
يوسف:وين هنا.
سعدى وبتحدي: لا بالمريخ ،،أكيد هنا أجل وين.
يوسف وبنظرات مربكه:ينزف الخافق تواضع لين لطختي جبينه،،وألا أنا ما كنت أبيها توصل لحد الإهانه،،ليش تحاولين تستفزين رجولتي وتبغيني أطلع من طوري،،كافي غرور وعناد يا سعدى.
سعدى إنحرجت من هدو يوسف:هذا موب غرور اللي تشوفه،،هذه عزة نفسي في قمة تواضعها،،أنا ما أحب أحد يفرض كلامه علي.
يوسف بذوق:أنا ما أفرض كلامي على أحد،، ياسعدى أنا ما أعرفك ولاتعرفيني لكن إحترميني على الأقل عشان اللي بيننا.
سعدى وبنرفزه:خير وش اللي بيننا.
يوسف:دم وقرابه.
<إسلوب يوسف غريب،،ما قد تعاملت مع أحد وقفني عند حدي بإسلوب محترم زي إسلوبه>
يوسف :خلينا نمشي.
سعدى وبكبرياء:راح أمشي لأني خلصت شغلي موب علشانك.
يوسف وبإبتسامه غامضه: مو مشكله بس إمشي.
(كان الشعب ينتظرنا بالسياره،،طول ما كنت بالطريق أفكر في طريقة يوسف وتعامله يعني لو كان ماجد مكان يوسف كان كفخني وتقاضبنا بالشعور،،آه كان يوم شين بالنسبه لي ،،أكره السوق
والموقف اللي صار لي مع يوسف كرهني حياتي.
جاء يوم العرس،،كان زواج خلود بنت عم بشرى،،الكل متحمس ،،على الأقل نغير جو،، من العصر وحنا نحوس بأنفسنا،،كالعاده البنات هم آخر من يخلصون بالمناسبات،، خالاتنا الكبار راحو قبلنا وحنا تركوا عندنا نواف عشان يوصلنا للزواج،، تقريبا خلصنا على الساعه 8 تقريبا،،وبحركه سريعه ركبنا السياره:
نواف معصب:وراكم تأخرتو يكفي إن القاعه آخر الدنيا.
سديم:إنشاءالله نوصل بدري.
نواف:هين هذا وجهي إن وصلنا موب قايل إن القاعه بقلعة وادرين.
سعدى:وش رأيك بدال ما تهذر إمش وفكنا.
(مشينا وبنص الطريق وحنا متجهين للقاعه،،وقف نواف على جنب،،إستغربنا وش السالفه)
نواف وهو معصب: أمك ياالحظ المنحوس.
كادي وش صاير:بنشر كفر السياره،،من وجيهكن النحسه.
<البنات قعدوا يصارخون>
حمده:مستحيل صار لي شهر وأنا أتدرب على الرقص.
نواف:مالت عليتس،،أقول الكفر بنشر وإنتي بلشانه بالرقص.
سعدى:طيب خلونا نفكر وش الحل.
نواف:بتصل في الشباب يجون يساعدوننا،،تقريبا يبغالهم ساعه على بال ما يوصولون.
أسماء:وه ياقليبي ساعه وأنا منقعه بالحر.
نواف:أوف يالقهر العرس راح يطوفني و السبب إنتن.
سعدى تنرفزت:والله محد قال لك هايط قدام خوالي إنك بتودينا.
نواف:والله إني مقرود حظ.
كادي:بليز بسرعه دق عليهم.
<كلم نواف الشباب وقالوا مشوار الطريق ويجون>
سعدى وبتنهيده:يعني ننطق إلين ما يجون.
هبوب: أوف حر مكياجي إنعدم.
نواف:خلونا نصبر ربع ساعه لو محد جاء نحاول نحلها بأنفسنا.
<قعدنا أكثر من ربع ساعه ميتين من الحر،،ونحتري أي أحد يجي>
نواف:إدخلوا السياره بسرعه.
سديم وبخوف:ليش وش صاير؟
نواف بصراخ:إدخلوا السياره ولا تسألون.
كادي:أمانه وش فيه؟؟
نواف:تشوفون ذيك السياره اللي واقفه هناك حولنا.
سعدى:إيه وش فيها؟
نواف:مدري موب عاجبني وقفتها،،ومليانه شباب حاس وراهم بلا.
<أسماء وأروى من الخرعه قعدوا يصيحون>
سعدى تحاول تهدئي الموقف: لاعادي يانواف تلقاهم متعطلين زي حالتنا