<الفصل التاسع>
<في غرفة البنات>>
خاله رقيه:إسمعوني نينا اليوم مريضه ومافيها حيل ترتب شي،،وخدامة خالتكم نوره راحت معها للسوق.
سعدى:من الآخر وش المطلوب.
خاله رقيه وبإبتسامه:المطلوب جايه أقسم الشغل بينكن خاصه إن الرجال كلهم معزومين،،ومامن أحد.
أروى:أوف لا حول.
خاله رقيه:وجع توجع العدو لا تقولين لي أوف.
كادي:خاله أنا ما ألمس المطبخ لو تنطبق السماء على الأرض.
خاله رقيه:إسمعو التقسيم ولا وحده تناقش.
سعدى بنرفزه:شوفي من هالحين أقول لك قسم القرف حق العيال لو تسدحين ما أروح هناك.
خاله رقيه وبجديه: أروى إنتي وكادي عليكم مجلس الحريم.
كادي وبصرخه:وناااااااسه الحمدالله فكه.
خاله رقيه تواصل التقسيم:هبوب وسديم مجلس العيال.
<معالي نطت خاله تكفين خليني معاهم>
خاله رقيه:لا يامعالي إنتي وحمده عليكم مجلس الشيبان.
(صار وجه معالي كأنه مصقوع بطابوقه)
خاله رقيه تواصل:بشرى بتنظفين غرفتكن.
بشرى بإسفهلال:الله يوفقك ياخاله هذا العدل.
سعدى خاشه عرض:أكيد قاطتني بالمطبخ والله معصي أجيه.،،ومعلومه ثانيه والله لو على جثتي ماطبيت غرفة عيدوه أنظفها.
خاله رقيه بضحكه:لا ياسعدى كلش ولا المطبخ ودار يمه عيده خبري فيك ناعمه ماعمرك كسرتي شي.
سعدى:ياخاله ماله داعي دقات،، خبرك عتيق ودعنا التكسير وطحنا بالمكافخ.
خاله رقيه بإبتسامه:عشان كذا أعطيتك أسهل شي إنتي وأسماء،، عليكن تغسيل الحوش.
سعدى وبإسفهلال:يالبيه هذه الفله والهياص عشان أحط صابون وأقعد أتزحلق.
خاله رقيه ميته ضحك على سعدى: هههه المهم فوزيه إنتي عليك غرفة يمه عيده.
فوزيه وهي تتحلطم:حرام عليكم.
خاله رقيه:فيه أي أعتراض قبل لا أطلع.
البنات بصوت واحد:لا فديناك.
خاله رقيه:يا الله إنتشروا وأنجزو المهمه قبل لا يجون الرجال.
(كادي وأروى قعدو يركضون لمجلس الحريم يبون يخلصون بسرعه علشان يروحون يلعبون مع سعدى بالحوش،،أما سديم وهبوب راحو لمجلس العيال)
بشرى قعدت ترتب غرفتهن وتصفظ الفرش وهي تسب وتشتم.
<الله يقطع شركم من بنات ،،وش هذا كأنها غرفة عيال عزابيه موب غرفة بنات،،الملابس على الأرض،، وعلب المكياج مرميه بكل مكان،،أوف ياربيييه زهقت وأنا بلحالي،،إيش هذا،، دفتر مين؟؟ خبري كل البنات وجيههن وجيه دجه موب وجيه دفاتر،،بس أنا وهبوب اللي فينا شوي رجاء>
<<<فتحت بشرى الدفتر ومكتوب بالأحمر بالنص:
شقرديه ما تهاب،،سعدى من طيبها راحت لعيونها أرقاب>>
بشرى والمفاجأه تكسو محياها<<معقوله سعدى تكتب!!
(تصفحت بشرى الدفتر وصعقت من اللي تقرأه)
<< لا مستحيل هذه خواطر سعدى،، يا الله عندها إسلوب معبر،، إنسانه موهوبه حرام محد داري عنها>>
بشرى كملت تصفح بالدفتر إلين وصلت لخاطره كاتبتها سعدى ،، من قرأتها بشرى تأثرت مره وقامت تصيح،، كانت الخاطره مكتوبة بعنوان،،
(($$))"أماه إدفنيني بين ضلوعك"
الليل يأتي في سكون..
يكللني ببرده و صمته المجنون
و أقف هنا أيها العالم
و عتبات ذكرياتي تحرسها روح حنون..
تحوم كلما حن قلبي و عزفت على أوتار حبها بعض اللحون..
أيا حنيني الغائب..
أيا حبي الذي خلد على مر القرون
أماه..
هاهو الصبح يطل
و أرى طيفك يودعني في سلام
سأشتاق إليك يا هبه المنان
سألف نفسي بذ****
و أدعو لنفسي أن ألقاك
و أنام..
(صكت بشرى الدفتر ودموعها أربع أربع،،يا الله ياسعدى ورى كل هالقوة و كل هالضحك إنسانه كلها رقه وطيبه،، معقوله سعدى تكتب بقلم كله إحساس ومشاعر،،آه يوم عن يوم يزيد إحترامي لسعدى،، ماراح أخليها خواطرها لازم تطلع تشوف النور،،
<نزلت بشرى الدفتر عشان تكمل شغلها وتنضم للبنات.
(في مجلس الشيبان)
معالي وحمده ينظفون المجلس،،
معالي وبنرفزه:آه ياكبدي اللي بتنفقع ماقطوني إلا هنا.
حمده:وراتس معصبه عادي،،وه يازين الشيبان على قليبي.
معالي:مالت عليك وعليهم وعلى حظي الردي اللي قطني على مجلسهم.
حمده وهي طربانه تغني:وش أسوي بحظي طاح عيا يقوم،، كل ما قلت يصفى زماني يشين،، هلا هلا تنكس.
معالي رمت علبة المنديل في وجه حمده:ما لقت خاله رقيه إلا إنتي تقطها معي.
حمده فاطسه ضحك:عايشه جوي موب مثلك صاكه فيها الدنيا.
معالي:بلاك ماتدرين،سلطان موجود ماراح معاهم.
حمده:اها عشان كذا ياخايسه مطنقره،،بعدين تعالي وإنتي وش دراك عنه.
معالي إرتبكت:أقول خلينا نخلص بسرعه عشان نروح نتزحلق مع سعدى بالحوش.
حمده:يالبيه ياسعدى من جت وهي مسويه لنا جو.
معالي وبتنهيده:موب متخيله إن باقي شهر وتسافر.
حمده:دخيلك لا تذكريني أحاول أنسى.
<في مجلس الشباب>
سديم وهبوب ينظفون،،
سديم وهي متحمسه: ههههه أحلى يوم بحياتي أخيرن دخلت غرفة هالمهابيل.
هبوب:يممماه تصدقين تخرع زي وجيههم.
سديم:هههه أحس غرفتهم راعية مقالب مثل خششهم.
هبوب:تدرين إني منقهره إني أنظف علشانهم.،،خاصه ماجد ياكرهي له ثقيل دم.
سديم:لا حرام عليك ماعرفتي ماجد زين،،قلبه طيب.
هبوب وبتعجب:إنتي ما تلاحظين إنك قاعده تدافعين عنه واجد.
سديم تصرف الموضوع:لا عادي المهم هاتي الكاسات اللي هناك.
هبوب وبنظرات تشكك:وش قال ماجد قلبه طيب إيه هين.
سديم وبشهقه:هبوب في إثنين من العيال جايين بسرعه وين الشراشف.
هبوب:ماجبت مع شي موب خالتي قالت مامن أحد.
سديم:لعنبو دارك وش السواة.
هبوب:وأنا وش دراني.
سديم وبربكه: ياويلي هالحين يفتحون الباب.
هبوب:تعالي بسرعه ندخل المقلط ونصير ورى الباب.
(المقلط مشترك مع غرفة العيال)
<دخلت هبوب وسديم بسرعه وحاولو يناظرون من اللي دخل>
يوسف:لا ياسلطان للحين موب مستوعب السالفه.
سلطان بحماس:كيفك لاتصدق.
يوسف:تكفى شوي شوي أبي أستوعب السالفه،ماجد يحب والله من المعجزات.
سلطان وبقهقه:هههي شفت الدنيا وش لون دواره،عقبالك.
يوسف: لا لا أنا آخر واحد ممكن أدخل نفسي بهالمواضيع.
سلطان:على مين تلعبها،،أنا خويك وعارفك زين تلعبها وإنت ساكت.
يوسف يصرف الموضوع:هالحين كيف عرفت إن ماجد يحب هالمصرقعه.
سلطان:ليش ماتعرف ماجد فضيحه مايهمه أحد،فقشها ذاك اليوم قدامنا كلنا.
يوسف:إخس ماعنده وقت.
سلطان:بس يا أخي والله إنه دفش يقول بمسكها وبقول لها غصب عن خشمها.
يوسف:ههههه للحين موب داخله السالفه رأسي.
سلطان:العجب موب هنا،،أنا موب متخيل شكل سديم لو درت إن ماجد يموت عليها،،أحس البنات حاقدين عليه.
< سديم من ورى الباب صرخت صرخه خفيفه بس هبوب صكت فمها عشان محد يسمع>
يوسف:إن جينا الصدق تراهم لايقين لبعض.
سلطان:والله مجودي يستاهل كل خير.
يوسف:تعال على الطاري وش أخبارك مع معالي.
سلطان وحاط يده على قلبه: لا تطري إسمها توقف عروق قلبي.
يوسف وبإبتسامه.أوف لهدرجه.
سلطان:وأكثر،يا أخي أموت فيها ،أحبها يعني أعشقها.
يوسف:صار بينكم شي.
سلطان:لا بس مسجات.
يوسف بعد صمت:الله يجمع بينكم،،المهم أنا بخليك بروح للمخزن بجهز العده إحتمال بكرا ورانا كشتة للبر.
سلطان:يوه نسيت خالي خالد وصاني على أغراض من البقاله بروح قبل يجي ويفضحنا.
<يوسف راح للمخزن المقابل للحوش من الجهه الخلفيه،، وسلطان راح يكمل الأغراض ،،أول ماطلعوا سديم إنهارت على هبوب تصيح>
هبوب:من عذرك تصيحين ،،ماجد العله يحبك،، ياجعله للعله اللي تعله.
سديم:لا لا تدعين عليه.
هبوب:بدعي وبدعي إلين ما يفكنا ربي منه.
سديم:لا تكفين كل شي ولاماجد.
هبوب بإستغراب:الظاهر إنك طايحه بالعسل وحنا ما ندري.
<سديم ساكته وتفكر>
هبوب:ورى ماتردين.
سديم وبعد صمت طويل:تبغين الصدق من 4 سنوات وأنا قلبي مايعرف غير ماجد.
هبوب مصدومه:نعم وش تهرجين 4 سنوات وساكته.
سديم وبإبتسامه:يا هبوب أشياء كثيره منعتني أعترف في حبه.
هبوب:أفا حنا صديقاتك وبنات خالاتك حتى مالمحتي لنا.
سديم:كبريائي خلاني أتعذب كل هالسنوات.
هبوب:لا بالعكس شوفي النتيجه هو من نفسه إعترف أحسن من تقطين وجهك.
سديم:يارب يعترف مثل ما أعترف سلطان لمعالي.
هبوب بضحكه ساخره:عاد ما لقيتي إلا ماجد زي سلطان،، ماجد زين مايكسر الباب علينا ويقول عبلتي أتقبلين عنتره.
سديم:خلاص صكي الموضوع أحس للحين مانيب مصدقه.
هبوب:هههههه خلينا نخلص بسرعه ونروح نتزحلق مع سعدى.
<في هذه اللحظات البنات كل وحده خلصت شغلها وتجمعوا عند سعدى بالحوش،،كلهم كانو لابسين بناطيل بإستثناء سعدى مخربتها لابسه بنطلون تحت الركبه على نصف الساق وكان لونه زيتي غامق مع بلوزه كموني ،،أضفى عليها شي من ملامح الأنتوثه،،وأسدلت شعرها القصير بدون أي تسريحه كانت سعدى بشكل آخر يعطي جمال من نوع ساحر،،بإختصار جمال نجدي باهر،،عيون ساح منها شوية كحل ودعج عيونها بالسواد،، بشره برونزيه تعكس لهيب الصحراء على وجنتيها،،خصل شعرها السودا رسمت معنى غريب فيه غموض سعدى العميق،،سعدى مسكت هوز الماء وترش على البنات وأروى وأسماء يكبون الصابون،، سديم وهبوب ومعالي وحمده يلعبون بالكوره ويتزحلقون،،أما بشرى ماسكه فوزيه وكادي ويركضون على الماء،،قعدوا يصارخون ويهيصون ووحده تدف الثانيه>
سعدى وبصوت جهور:أقول شوتي الكوره علي لا أطيحكم.
سديم:هاك بس وخري عني.
هبوب:بسرعه ناولي الكوره قبل تجي معالي.
طراآآآخ
<أوتش أروى رفست على وجهها>
(البنات شافوها طايحه فقعوا عليها ضحك)
سعدى جت طايره:سديم إستعدي للقذف.
<طرآآخ سعدى طيحت سديم>
سديم ماسكه ظهرها تصارخ: يادفشه مافيك من النعومه شي.
سعدى قعدت على الأرض من الضحك.
(بشرى مسالمه يالباها بس إنها مقرودة حظ راحت على الطرف ينقالك تبي تتزحلق بعيد عن تصادمات البنات العنيفه،،مسكينه جت طايره تزحلق شوي وتطلع هبوب في وجهها،،ويتصاقعون وللاسف رفسوا إثنينهم على الأرض)
المهابيل خلصو أربع علب صابون تايد،)
<هههه على مرافسهم لمعوا بلاط الحوش تلميع>
بالجهة الخلفيه من الحوش كان يوسف بالمخزن يجهز عدة الكشته وسمع أصوات البنات ,,,يوم طل عليهم وشاف خششهم <أشكالهم>قعد يضحك عليهم>
من سؤ حظ البنات،،الشباب وصلوا،،وسمعوا أصوات البنات وصراخهم،،كل واحد مسك أقرب شباك يطل على الحوش وقامو يناظرون من ورى الشبابيك،، إلا ماجدوه ما عنده وقت خذا منصور ونواف وسالم وطبوا على البنات بالحوش ماهمهم أحد،، البنات أول ما شافوهم قعدو يصارخون وإختبصن ولا وحده قدرت تقوم صح،، أروى وكادي كلما وقفوا طاحو،، سديم ضمت هبوب عشان تغطي وجهها.
(سعدى هي الوحيده اللي وقفت بجرأه تناظر لماجد)
سعدى:والله إنك ما تستحي على دم وجهك.
ماجد فاطس ضحك:خليت الحياء لك.
سعدى وبنرفزه:يا قليل الأدب خل عندك شهامه ورجوله وإنقلع عن وجهي.
ماجد:موب جاي عشان أشوفك إنتي وسيقانك.
سعدى:على تبن ولا يكثر بسرعه ضف وجهك قبل لا أصرخ أنادي خالتي عليك.
<هههه أحسها توهقت ما تقدر تنحاش تخاف تتفشل وتطيح>
ماجد وهو يناظر لسديم: سدومه والله ضمتي أبرك من هالخبله اللي ماسكتها.
<سديم تقطعت من الحياء>
سعدى وهي ماسكه هوز الماء:أروى بسرعه إفتحي الهوز.
<قامت سعدى ترش الماء على وجه ماجد ونواف ومنصور وسالم>
نواف وقد تبلل ثوبه بالماء:وجع تمصع عروق قلبك.
ماجد:سعدوش لعنبو دارك خلاص وخري الهوز عني.
<ماجد يصقع سالم:يالمفهي خلنا ننحاش بسرعه قبل تطلع خاله رقيه والله لا تطردنا>
سالم فاقع ضحك:واحد رش ماء على واحد وإبتلت هدومه هههه.
(الحوش الصابوني كان شي خرافي بالنسبه للبنات بعد ما خلصوا إنتشروا بالحمامات يتسبحون وبعد مرور ساعه تجمعوا وقعدوا يتقهون:
سعدى وبقهر:آه ياماجد من ترفس في بطنك.
هبوب:والله ما أخليه هو وهالصعاليك اللي واقفين بجنبه.
أروى وبضحكه: هههه إنتم تحسبون بس هذولا اللي شافونا!
معالي وبإستغراب:ما كان مع ماجد إلا نواف ومنصور وسالم.
أروى:تدرين إن باقي العيال كأنهم قرود على الشبابيك يناظرون.
سعدى رمت الفنجان:نعم وش تهرجين.
أروى:قسم منصور هو اللي قال لي.
معالي:أمحق من رجاجيل.
سعدى:أمك يالقهر ياليت من سدح ماجد وترفس في بطنه.
كادي:لا حقير شفتي وش قال لسديم.
بشرى:أخوي إنجن وقعد.
أسماء:خوفني يوم قال لسديم كذا،، ياربيييه مره بايخ.
سديم:بنات خلاص الولد ماقال شي غلط.
سعدى وتناظر بإستغراب:لا لا لا هذه اللي تبيني بدال ما أترفس في ماجد أقوم أترفس فيها.
هبوب:بلاكم ما تدرون.
معالي:تكفين صاير شي.
<سديم تحاول تأشر لهبوب تبيها تسكت>
سعدى وبإصرار:والله مالي طلعه من المجلس إلا وأعرف وش السالفه.
هبوب وبلقافه:يمديكم على الخبريه الجديده.
سديم بإنحراج:هبوب ماله داعي تقولين.
سعدى:تقول وغصب عنك،إهرجي هبوب.
(ههه الشيخه سعدى قالت كلمه غصب تمشي على الجميع)
<هبوب وهي تقهوى وتحلي على سالفة ماجد،، قالت للبنات كل الحوار اللي دار بين يوسف وسلطان >
البنات وبصراخ: حركات يا سديم من قدك، ماجد يحبك .