|
توني راجع من بنك الرياض ومن ثم البريد وتسليم الأوراق
السلام عليكم ورحمة الله
ابشركم البارح طبعت ورقة نموذج البريد الممتاز
وجلست الى اليوم انتظر ظهور نموذج سداد الرسوم طلع وطبعته وتوجهت للبنك
بنك الرياض الخبر شارع الملك فهد تقاطع 2 على مااعتقد
المهم عطاني الورقه (ورقة إيداع)
كتبت اسمي وجوالي ورقم السجل والمبلغ ورقم حساب الجامعه ودفعت الرسوم 2475
اعطيتها الموظف دخلها بالجهاز واخذ منها الاصل والنسخه عطاني قال تعطيها البريد
قلت ياخي الجامعه تقول نسخه مصدقه تعطيها البريد ونسخه تحتفظ بها قال لا هذا الكلام قديم وجانا تعميم
المهم وريتة النموذج الذي طبعته من موقع الجامعه (نموذج سداد الرسوم) قلت ختموه تكفون قال جانا تعميم وهذا الكلام قديم
المهم رحت لنائب المدير قال اجلس واستريح وهد اعصابك
فعلاً يا اخي كلام الموظف صحيح فقط خذ النسخه الثانيه من ورقة الايداع وودها البريد الممتاز
قلت شورك هداية الله :)
ومسرع ابي اصدم العالم لاني ابي اسافر وماشي الحين بعد صلاة العصر وقلت انزل الموضوع تستفيدون
رحت للبريد الممتاز بالثقبه اكيد تعرفونها مشهوره :) البريد هناك
جيت الموظف قلت جامعة قال اوكي هات بالترتيب
1.نموذج البريد الممتاز وعطيته شقه نصين نص عطاني ونص اخذه :)
2.صورة 4*6 وعطيته
3.صورة بطاقة الاحوال او كرت العائله للبنات وعطيته بطاقة الأحوال
4.نسخه من ورقة الايداع البنك وعطيته
5.شهادة الثانوية الأصل
قال خلاص ومقبول توقعت الرجال موظف بالجامعه يمزح يقول اوراقك بالسليم
رجعت لموالي الاول قلت في نموذج بالجامعة اسمه سداد الرسوم قال نفس كلام موظف البنك مايحتاج وقديييم
عطاني نسخة التتبع وقال احفظها يطلبونها الجامعة وتابع عن طريق الموقع
هذا علمي وسلامتكم
نقطتين تفهمونها زملائي المنتسبين
لاداعي لطباعة نموذج سداد البريد فقط حفظ رقم حساب جامعة الملك فيصل وسجلها بقسيمة الايداع
2.الشباب البارح يعانون إذا جو بيطبعون نموذج من الموقع يظهر الترميز غير مفهوم وحله بالطريقة التاليه من اعلى المتصفح عرض ثم ترميز المحارف ومن ثم utf 8 هذا متصفح فيرفوكس
متصفح اكسبلورر عرض ومن ثم ترميز ونفس الحكايه utf8 واذا ماضبط رجعه ويندوز عربي وبيضبط
يعلم الله مسافر بعد نصف ساعه بالكثير ويمكن افطر بالرياض وينكم يااهل الرياض ماتعزمون
وعلى الطائف
وفق الله الجميع
واي استفسار اطرحوه هنا وان شاء الله اذا وصلت بالسلامه وقدرت ادخل على اخر الليل رديت
والمعذره الكتابه على السريع والاسلوب ركيك :)
التعديل الأخير تم بواسطة وائل بن خضر ; 2010- 8- 31 الساعة 03:34 PM
|