صحيح الميانة لازم تكون موجوده وهذا يعبر عن عمق العلاقة بين الاثنين
لكن انا اتفق معك انها لازم ما تتعدا حدود الاحترام
بس شخصيات الناس تختلف ودرجة تحسسهم بعد تختلف
يعني اذا اتقبل بعض العبارات او التصرفات من باب الميانة يمكن غيري ما يتقبلها
او يضنها انها تقليل من احترامه .
وبعد الميانه لها اوقات وضوابط معينه مو في كل الاوقات انا لازم اكون مطيحه الميانه مع شخص معين
حتى لو كان عزيز علي او صديق العمر أو قريب مني جدا او ....او ....
مثلا في بعض المواقف تطلب مني احترام هذا الشخص وعدم التطاول بلفظ او حتى بتصرف
على اساس انه من باب الميانه لان الموقف ما يسمح بكذا
لوجود ناس غرباء او العلاقة معهم رسمية في نفس المكان
يعني مثلا:
انا من الناس اللي أسمح بالميانه اذا كنا لوحدنا او بين أشخاص يعرفون بمدى علاقتنا
لكن في كل وقت وفي كل مكان مطيحه معي الميانة وبقوة
دون الأخذ بالاعتبار بالمكان اللي احنا متواجدين فيه او الاشخاص المحيطين فينا
فهذا اللي انا ما أسمح فيه
يقولك المثل الشيء اذا زاد عن حده أنقلب ضده
والميانة اذا زادت عن حدها يمكن تنقلب لكرهـ و تسبب المشاكل بين بعض
يعني حلوة الميانة اللي يكون فيها احترام متبادل بين الطرفين
بالعكس هذا الشيء اللي راح يزيد من عمق العلاقة والترابط بينهم وبين بعض
مشكوورهـ أختي على موضوعك الرائع
وأسفة على الإطالة.